غزہ پر اسرائیلی فضائی حملوں کا سلسلہ بدستور جاری ہے، گزشتہ 24 گھنٹوں کے دوران صرف غزہ سٹی میں 43 افراد سمیت مجموعی طور پر 73 فلسطینی شہید کئے جاچکے ہیں۔
عرب میڈیا نے اسپتال ذرائع کے حوالے سے دعویٰ کیا ہے کہ اسرائیلی فورسز نے پوری رات مسلسل اور شدید بمباری کا سلسلہ جاری رکھا، جس سے بڑے پیمانے پر تباہی ہوئی ہے۔
ادھر حماس نے اعلان کیا ہے کہ وہ غزہ میں ایک آزاد قومی انتظامیہ کے قیام پر متفق ہے اور مکمل جنگ بندی کے معاہدے کے لیے تیار ہے، جس میں تمام اسرائیلی قیدیوں کی رہائی بھی شامل ہوگی۔
تاہم اسرائیلی وزیرِاعظم بینجمن نیتن یاہو کے دفتر نے حماس کے اس بیان کو مسترد کرتے ہوئے کہا ہے کہ جنگ فوراً ختم ہوسکتی ہے لیکن صرف ان شرائط پر جو اسرائیلی کابینہ نے طے کی ہیں۔
اس دوران اسرائیل کے کٹڑ دائیں بازو سے تعلق رکھنے والے وزیرِ خزانہ بیزالیل سموٹرچ نے تقریباً پورے مقبوضہ مغربی کنارے کو اسرائیل میں ضم کرنے کا منصوبہ پیش کر دیا اور نیتن یاہو سے اس کی توثیق کا مطالبہ کیا ہے۔
اکتوبر 2023 سے جاری جنگ میں اب تک کم از کم 63 ہزار 746 فلسطینی شہید اور ایک لاکھ 61 ہزار 245 زخمی ہوچکے ہیں، جبکہ 7 اکتوبر کے حملوں میں اسرائیل میں 1 ہزار 139 افراد مارے گئے اور تقریباً 200 افراد کو یرغمال بنایا گیا تھا۔
