ٹی ٹوئنٹی ایشیا کپ میں بھارتی ٹیم آج اپنا پہلا میچ متحدہ عرب امارات کے خلاف دبئی میں کھیلے گی، یہ مقابلہ مقامی وقت کے مطابق رات ساڑھے سات بجے شروع ہوگا۔
بھارتی ٹیم طویل وقفے کے بعد انٹرنیشنل کرکٹ میں واپسی کر رہی ہے اور بطور دفاعی چیمپیئن، ایونٹ کی مضبوط ترین ٹیم تصور کی جا رہی ہے۔
شبمن گل نائب کپتان کی حیثیت سے اسکواڈ میں شامل ہیں۔ وہ حالیہ آئی پی ایل سیزن میں 650 رنز اور 155 کے اسٹرائیک ریٹ کے ساتھ نمایاں کارکردگی کا مظاہرہ کر چکے ہیں، جس کے بعد ان سے ایشیا کپ میں بھی شاندار کارکردگی کی توقع کی جا رہی ہے۔
دوسری جانب متحدہ عرب امارات کی ٹیم کی کوچنگ سابق بھارتی کھلاڑی لال چند راجپوت کر رہے ہیں، جو 2007 میں بھارت کو ٹی ٹوئنٹی ورلڈ کپ کا ٹائٹل جتانے والے کوچ بھی رہ چکے ہیں۔
یو اے ای کی ٹیم کی حالیہ کارکردگی متاثر کن نہیں رہی۔ میزبان ٹیم حالیہ سہ ملکی سیریز میں پاکستان اور افغانستان کے ہاتھوں شکست کھا چکی ہے جبکہ اس سے قبل یوگینڈا کے خلاف بھی ناکامی کا سامنا کر چکی ہے۔
