وزیراعظم پاکستان محمد شہباز شریف چین کا سرکاری دورہ مکمل کرنے کے بعد بیجنگ سے وطن واپس روانہ ہو گئے۔
بیجنگ کے کیپیٹل انٹرنیشنل ایئرپورٹ پر وزیراعظم کو پیپلز پولیٹیکل کنسلٹیٹو کانفرنس کی بیجنگ میونسپل کمیٹی کی رکن محترمہ ہین زیرونگ، چین میں تعینات پاکستانی سفیر خلیل ہاشمی اور پاکستانی سفارتی عملے نے پرتپاک الوداع کہا۔
وزیراعظم نے اپنے دورۂ چین کے دوران تیانجن میں شنگھائی تعاون تنظیم (SCO) کے سربراہانِ مملکت کے 25ویں اجلاس اور SCO پلس اجلاس میں شرکت کی۔
اجلاس کے دوران علاقائی تعاون، معیشت، سلامتی اور ترقی سے متعلق متعدد امور پر تبادلہ خیال کیا گیا۔
وزیراعظم نے فاشزم کے خلاف عالمی جنگ کی 80ویں سالگرہ کی تقریبات میں بھی شرکت کی، جہاں انہوں نے پاکستان کے امن، برداشت اور عالمی شراکت داری کے عزم کو اجاگر کیا۔
اپنے قیام کے دوران وزیراعظم محمد شہباز شریف نے چین کے صدر شی جن پنگ، وزیراعظم لی چھیانگ سمیت روس، ایران، ترکیہ، آذربائیجان اور تاجکستان کے صدور سے دو طرفہ ملاقاتیں بھی کیں۔
ان ملاقاتوں میں باہمی تعلقات، اقتصادی تعاون، علاقائی سلامتی اور توانائی و تجارتی منصوبوں پر گفتگو ہوئی۔
وزیراعظم نے دوسری چین-پاکستان بزنس ٹو بزنس (B2B) کانفرنس میں بھی شرکت کی، جہاں دونوں ممالک کے کاروباری رہنماؤں کے ساتھ تجارتی روابط بڑھانے، سرمایہ کاری کے مواقع اور صنعتی تعاون پر تبادلہ خیال کیا گیا۔
