اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر نے گلگت بلتستان اور آزاد کشمیر کے مختلف علاقوں میں لینڈ سلائیڈنگ کے خطرے کے پیشِ نظر الرٹ جاری کردیا ہے۔
این ڈی ایم اے کے ترجمان کے مطابق آئندہ دنوں میں ہونے والی ممکنہ بارشوں کے باعث حساس پہاڑی علاقوں میں لینڈ سلائیڈز اور سیلابی صورتحال کا خدشہ ہے۔
این ڈی ایم اے نے شہریوں کو ہدایت کی ہے کہ غیر ضروری سفر سے گریز کریں اور موسم و سڑکوں کی تازہ صورتحال کے لیے ریڈیو، ٹی وی اور ’’پاک این ڈی ایم اے ڈیزاسٹر الرٹ‘‘ ایپ سے رہنمائی حاصل کریں۔
انتظامیہ کا کہنا ہے کہ کشمیر کے اضلاع خصوصاً مظفرآباد، نیلم ویلی، حویلی، باغ، پونچھ اور سدھنوتی میں شدید بارشوں کا امکان ہے جس کے باعث زمینی تودے گرنے کے واقعات پیش آسکتے ہیں۔
مزید یہ کہ شاہراہ قراقرم کے مختلف مقامات پر بھی لینڈ سلائیڈز کا خطرہ بڑھ گیا ہے جب کہ ٹورغر روڈ (120 کلومیٹر)، بٹگرام روڈ (140 کلومیٹر)، شانگلہ روڈ (160 کلومیٹر)، لوئر کوہستان روڈ (180 کلومیٹر)، تتا پانی روڈ (320 تا 360 کلومیٹر)، گلگت روڈ (400 تا 420 کلومیٹر) اور ہنزہ، روندو، اسکردو اور چترال کے مقامات متاثر ہوسکتے ہیں۔
این ڈی ایم اے نے واضح کیا ہے کہ نیشنل ایمرجنسی آپریشن سینٹر 24 گھنٹے کے لیے فعال ہے اور سول و عسکری اداروں کے ساتھ مسلسل رابطے میں ہے۔ عوام کو مقامی انتظامیہ کی ہدایات پر فوری عمل کرنے اور ہنگامی صورتحال میں امدادی ٹیموں سے رابطے کی ہدایت دی گئی ہے۔
