بھارت اپنی ہی حکمتِ عملی کے سامنے ناکام، جنوبی افریقا کی شاندار کارکردگی
جنوبی افریقا کی کامیابی کی بڑی وجہ اس کی منصوبہ بندی تھی، کم رفتار گیندوں نے بھارتی بلے بازوں کو تگنی کا ناچ نچائے رکھا
-
راؤ بلال شمشاد -
ٹی ٹوئنٹی ورلڈ کپ کے اہم مقابلے میں جنوبی افریقا نے میزبان بھارت کو انہی کے انداز میں شکست دے کر میدان مار لیا۔
نریندر مودی اسٹیڈیم میں کھیلے گئے اس میچ میں جنوبی افریقا نے بہترین حکمتِ عملی اور فیلڈنگ کا مظاہرہ کیا۔
بھارت کی 188 رنز کے ہدف کے تعاقب میں ابتدا تو شاندار رہی، مگر بعد میں بیٹنگ لائن لڑکھڑا گئی اور ٹیم 111 رنز پر آؤٹ ہوگئی۔
جب ہاردک پانڈیا 15ویں اوور میں آؤٹ ہوئے تو اسٹیڈیم میں موجود 82 ہزار شائقین کی بڑی تعداد اسٹیڈیم چھوڑنے لگی اور ماحول خاموشی میں بدل گیا۔
مزید پڑھیں: ٹی ٹوئنٹی ورلڈ کپ میں دو نئی سنچریاں، اب تک کا ریکارڈ کیا کہتا ہے؟
جنوبی افریقا کی کامیابی کی بڑی وجہ اس کی منصوبہ بندی تھی۔ بولنگ میں خاص طور پر رفتار کم کر کے گیندیں کروائی گئیں، جس سے بھارتی بلے باز مشکلات کا شکار ہوئے۔
لُنگی نگیڈی اور مارکو جینسن نے نپی تلی لائن اور لینتھ کے ساتھ بیٹنگ کو دباؤ میں رکھا، جبکہ اسپنرز نے بھی اہم مواقع پر وکٹیں حاصل کیں۔
بھارتی ٹیم، جو گروپ مرحلے میں کئی بار انفرادی کارکردگی کے سہارے میچ جیتتی رہی تھی، اس بار کسی ایک بلے باز کی بڑی اننگز سے فائدہ نہ اٹھا سکی۔
جنوبی افریقا نے نہ صرف نئی حکمت عملی اپنائی بلکہ بھارتی کمزوریوں کو نشانہ بنا کر میچ پر مکمل کنٹرول حاصل کیا۔
آخر میں اسٹیڈیم میں چھائی خاموشی اس بات کی علامت تھی کہ بھارت کو اسی کے کھیل میں شکست ہوئی اور جنوبی افریقا کی حکمتِ عملی مکمل طور پر کامیاب رہی۔
