اسلام آباد: پاکستانی شہریوں کے بیانات سامنے آنے سے بھارت کا پاکستان کے خلاف دہشت گردی کا جھوٹا پروپیگنڈا ایک بار پھر بے نقاب ہوگیا۔
بھارتی میڈیا نے 28 اگست کو دعویٰ کیا کہ تین پاکستانی شہری کھٹمنڈو کے راستے بھارتی ریاست بہار میں داخل ہوئے اور انہیں دہشت گرد قرار دے کر ریڈ الرٹ جاری کردیا گیا۔ تاہم حقیقت سامنے آنے پر بھارتی جھوٹ کا پول کھل گیا۔
تفصیلات کے مطابق یہ تینوں پاکستانی شہری روزگار اور سیاحت کے لیے نیپال اور کمبوڈیا جا رہے تھے۔ بہاولپور کے محمد عثمان ولد بشارت نے وضاحت کی کہ وہ 8 اگست کو براستہ دبئی کھٹمنڈو روانہ ہوا تھا، لیکن بھارتی میڈیا نے انہیں دہشت گرد بنا کر پیش کیا۔
مزید پڑھیں: بھارت کو پانچ سالہ جنگوں کی تیاری کرنا ہوگی؛ بھارتی وزیر دفاع
اسی طرح میرپور خاص کے عادل حسین نے بتایا کہ وہ پرواز ایف زیڈ 344 کے ذریعے کھٹمنڈو پہنچا اور 27 اگست کو کمبوڈیا گیا، نیپال میں صرف گھومنے اور تفریح کے لیے رکا تھا۔
کراچی کے حسنین علی نے کہا کہ وہ 28 اگست کو باتک ایئرویز کے ذریعے ملائیشیا روانہ ہوا اور نیپال محض سیاحت کے لیے گیا تھا، بعد ازاں کمبوڈیا جا کر دوبارہ پاکستان واپس آنا تھا۔ ان تینوں پاکستانیوں کے بیانات نے بھارت کے جھوٹے دعوے کی حقیقت دنیا کے سامنے آشکار کردی۔
خیال رہے کہ ریاست بہار کے انتخابات قریب آتے ہی بھارتی خفیہ ایجنسی “را” کی ایماء پر پاکستان مخالف پروپیگنڈا تیز کر دیا گیا ہے۔ پاکستان پہلے ہی خبردار کر چکا ہے کہ بھارت آپریشن سندور میں ہونے والی ہزیمت چھپانے کے لیے بے بنیاد الزامات اور فیک انکاؤنٹرز کا سہارا لے گا۔
واضح رہے کہ رواں سال مئی میں پاکستان نے بھارتی جارحیت کا بھرپور جواب دیتے ہوئے 3 رافیل طیاروں سمیت 7 جنگی طیارے اور متعدد ائیر بیسز تباہ کیے تھے، جس کے بعد بھارت مسلسل جھوٹے بیانیے گھڑ کر دنیا کو گمراہ کرنے کی کوشش کر رہا ہے۔
