کراچی میں 11 اور 12 ربیع الاول کو ہیوی ٹریفک چلانے پر پابندی عائد کر دی گئی ہے۔
ڈپٹی انسپکٹر جنرل (ڈی آئی جی) ٹریفک پولیس پیر محمد شاہ نے شہر قائد میں 11 اور 12 ربیع الاول کو ڈمپر اور دیگر ہیوی ٹریفک چلانے پر پابندی کا نوٹی فکیشن جاری کردیا ہے۔
ٹریفک پولیس حکام کے مطابق تمام ڈمپر مالکان کو پابندی سے متعلق آگاہ کر دیا گیا ہے جبکہ پابندی کی خلاف ورزی کے مرتکب ڈمپرز اور دیگر ہیوی ٹریفک کی گاڑیوں کے خلاف کارروائی کی جائے گی۔
یہ بھی پڑھیں: قومی اسمبلی کا اجلاس یکم ستمبر کو طلب، ربیع الاول مذہبی جوش و جذبے سے منانے کی ہدایت
واضح رہے کہ شہر قائد میں 11 اور 12 ربیع الاول کو جشن میلادالنبی ﷺ کے حوالے سے ریلیاں نکالی جاتی ہیں، جلسے اور جلوسوں کا انعقاد کیا جاتا ہے، ان تقریبات میں شرکت کے لیے شہریوں کی بڑی تعداد موٹر سائیکلوں پر سوار ہوتی ہے۔
دونوں دن موٹرسائیکلوں کے رش کو مد نظر رکھتے ہوئے ٹریفک پولیس کی جانب سے یہ پابندی عائد کی گئی ہے، تاکہ ہیوی ٹریفک کے نتیجے میں حادثات اور ناخوشگوار واقعات سے بچا جاسکے۔