پاکستان کے معروف اداکار ہدایتکار اور پروڈیوسر نبیل ظفر نے ملک میں بڑھتی ہوئی مہنگائی اور بجلی کے بلوں کو ناقابل برداشت قرار دیتے ہوئے شدید تشویش کا اظہار کیا ہے۔
ایک نجی ٹی وی پروگرام میں گفتگو کرتے ہوئے نبیل ظفر نے کہا کہ موجودہ بجلی کے بل اتنے زیادہ آ رہے ہیں کہ انہیں دیکھ کر کوئی بھی دل کے دورے کا شکار ہو سکتا ہے۔
نبیل نے بتایا کہ اب میں اپنے گھر میں اضافی لائٹس یا پنکھے چلتے دیکھ کر فوراً انہیں بند کرنے کا حکم دیتا ہوں کیونکہ بلوں نے میرا برا حال کر رکھا ہے۔
مزاحیہ انداز میں انہوں نے کہا کہ ایسا لگتا ہے جیسے میرے والد کی روح میرے اندر آ گئی ہے، جو اکثر کہتے تھے ’بل بہت آئے گا بھائی۔‘
اداکار نے بتایا کہ مہنگائی اور بجلی کے بوجھ سے بچنے کے لیے میں نے اپنے گھر میں سولر سسٹم بھی نصب کروا لیا ہے لیکن کراچی میں بادل چھانے کی صورت میں سولر سسٹم مؤثر طریقے سے کام نہیں کرتا، جو ایک بڑا چیلنج ہے۔
کراچی میں بادلوں کی موجودگی پر طنزیہ انداز میں بات کرتے ہوئے نبیل ظفر نے کہا کہ میں دل ہی دل میں بادلوں سے مخاطب ہو کر کہتا ہوں، ’یا تو برس جاؤ یا شہر چھوڑ دو تاکہ ہمارا سولر سسٹم چل سکے۔‘
