اسلام آباد: انسداد دہشت گردی عدالت اسلام آباد نے پاکستان تحریکِ انصاف (پی ٹی آئی) کے 50 رہنماؤں کے وارنٹ گرفتاری جاری کر دیے ہیں۔
یہ وارنٹس تھانہ کراچی کمپنی میں درج مقدمہ نمبر 1193 کے تحت جاری کیے گئے، جو سیاسی مظاہروں اور ممکنہ بدامنی سے متعلق ہے۔
ذرائع کے مطابق عدالت نے آج 41 نئے وارنٹ گرفتاری جاری کیے جبکہ 9 رہنماؤں کے خلاف وارنٹس پہلے ہی جاری کیے جا چکے تھے، مجموعی طور پر اب تک 50 رہنما اس کارروائی کی زد میں آ چکے ہیں۔
وارنٹ گرفتاری جاری کیے گئے اہم رہنماؤں میں سابق صدر ڈاکٹر عارف علوی، سابق وزیر اطلاعات شبلی فراز، سینیٹر فیصل جاوید، آئینی ماہر سلمان اکرم راجہ، سابق وفاقی وزیر مراد سعید، اور سابق وزیراعلی آزاد کشمیر عبدالقیوم نیازی شامل ہیں۔
فہرست میں روف حسن، احمد نیازی، وزیراعلی خیبرپختونخوا عمر امین گنڈاپور، اسد قیصر، حماد اظہر، عاطف خان، اعظم خان سواتی، عمر ایوب، شعیب شاہین، اور صاحبزاہ حامد رضا جیسے مرکزی قائدین کے نام بھی شامل ہیں۔
عدالت نے علیمہ خانم، شیخ وقاص اکرم، کنول شوزب، شاندانہ گلزار اور شیرافضل مروت کے بھی وارنٹ گرفتاری جاری کیے ہیں۔
یہ وارنٹس انسداد دہشت گردی عدالت کے جج ابوالحسنات ذوالقرنین کی جانب سے جاری کیے گئے، جنہوں نے مقدمے کے شواہد کی روشنی میں یہ اہم قانونی اقدام اٹھایا۔
