امریکی حملے کی صورت میں جوابی کارروائی کے لیے تیار ہیں، ایران

امریکی حملے کی صورت میں جوابی کارروائی کے لیے تیار ہیں، ایران

دوبارہ حملہ ہوا تو فیصلہ کن، طاقتور اور وسیع پیمانے پر ردِعمل دیں گے، خاتم الانبیا بریگیڈ

ایران کی خاتم الانبیا مرکزی بریگیڈ نے خبردار کیا ہے کہ کسی بھی ممکنہ امریکی حملے کی صورت میں فوری اور بھرپور جوابی کارروائی کے لیے مکمل تیاری کر لی گئی ہے۔

ایرانی خبر رساں ایجنسی تسنیم کے مطابق خاتم الانبیا بریگیڈ کا کہنا ہے کہ اگر ایران پر دوبارہ حملہ کیا گیا تو مسلح افواج فیصلہ کن، طاقتور اور وسیع پیمانے پر ردِعمل دیں گی۔

خاتم الانبیا مرکزی ہیڈکوارٹرز کے کمانڈر میجر جنرل علی نے امریکا اور اس کے اتحادیوں کو متنبہ کرتے ہوئے کہا کہ وہ کسی نئی اسٹریٹجک غلطی یا غلط اندازے سے گریز کریں۔

انہوں نے مزید کہا کہ ایران کی مسلح افواج پہلے سے زیادہ مضبوط، منظم اور ہر قسم کی صورتحال سے نمٹنے کے لیے مکمل طور پر تیار ہیں جبکہ کسی بھی نئی جارحیت کا جواب ماضی کے مقابلے میں زیادہ سخت اور مؤثر ہوگا۔