ڈھاکا ٹیسٹ، بارش اور کم روشنی کے باوجود بنگلا دیش کی پوزیشن مستحکم
پاکستان کی جانب سے شاہین شاہ آفریدی، حسن علی اور محمد عباس نے ایک، ایک وکٹ حاصل کی
-
ویب ڈیسک -
پاکستان اور بنگلادیش کے درمیان جاری ٹیسٹ میچ میں چوتھے روز کے اختتام پر میزبان ٹیم نے اپنی گرفت مضبوط کرلی جبکہ خراب موسم اور کم روشنی کے باعث کھیل مقررہ وقت سے پہلے ختم کرنا پڑا۔
بارش کے وقفے وقفے سے سلسلے نے دن بھر کھیل کو متاثر کیے رکھا تاہم بنگلادیشی بیٹرز نے دباؤ میں بھی ذمہ دارانہ بیٹنگ کا مظاہرہ کرتے ہوئے پاکستان پر اپنی برتری مزید بڑھا لی۔
کھیل ختم ہونے تک بنگلادیش نے دوسری اننگز میں 3 وکٹوں کے نقصان پر 152 رنز اسکور کر لیے تھے اور اسے مجموعی طور پر 179 رنز کی سبقت حاصل ہوچکی ہے۔
کپتان نجم الحسن شنتو 58 رنز کے ساتھ وکٹ پر موجود ہیں جبکہ تجربہ کار بیٹر مشفق الرحیم 16 رنز بنا کر ان کا ساتھ دے رہے ہیں۔
اس سے قبل مومن الحق نے 56 رنز کی اہم اننگز کھیلی، جبکہ شادمان اسلام 10 اور محمود الحسن جوئے 5 رنز بنا کر پویلین لوٹ گئے۔
پاکستان کی جانب سے شاہین شاہ آفریدی، حسن علی اور محمد عباس نے ایک، ایک وکٹ حاصل کی۔
یاد رہے کہ میچ میں پاکستان نے ٹاس جیت کر پہلے فیلڈنگ کا فیصلہ کیا تھا۔ بنگلادیش نے پہلی اننگز میں 413 رنز بنائے تھے، جبکہ قومی ٹیم 386 رنز پر آؤٹ ہوگئی تھی، جس کے بعد میزبان ٹیم کو پہلی اننگز میں برتری حاصل ہوئی۔
