امریکا ایران مذاکرات، برطانوی پارلیمنٹ میں پاکستان کی سفارتی کوششوں کی تعریف
پاکستان، امریکا اور ایران کے درمیان کشیدگی کو ختم کرنے اور امن کو ترجیح دینے کی کوششوں میں ایک’قائدانہ کردار‘ادا کررہا ہے
-
ویب ڈیسک -
برطانوی پارلیمنٹ میں پاکستان کی مشرقِ وسطیٰ میں قیامِ امن کے لیے جاری سفارتی کوششوں کا تذکرہ ہوا ہے، جہاں ایک رکنِ پارلیمنٹ نے پاکستان کے کلیدی کردار کو سراہا۔
برطانوی رکن پارلیمنٹ محمد افضل نے ایوان میں اظہارِ خیال کرتے ہوئے کہا کہ پاکستان، امریکا اور ایران کے درمیان کشیدگی کو ختم کرنے اور امن کو ترجیح دینے کی کوششوں میں ایک’قائدانہ کردار‘ادا کررہا ہے۔
انہوں نے برطانوی وزیراعظم سے سوال کیا کہ برطانیہ مشرقِ وسطیٰ میں دیرپا اور پائیدار امن کے قیام کے لیے پاکستانی حکومت کی ان کوششوں میں کس طرح تعاون فراہم کررہا ہے۔
یہ بیان ایک ایسے وقت میں سامنے آیا ہے جب خطے میں جاری کشیدگی کے خاتمے کے لیے پاکستان کی ثالثی اور سفارتی کاوشوں کو عالمی سطح پر مانیٹر کیا جارہا ہے۔
برطانوی پارلیمنٹ میں اس طرح کے سوالات بین الاقوامی سطح پر پاکستان کے سفارتی اثر و رسوخ اور خاص طور پر ایران امریکہ مذاکرات میں اس کے بطور ثالث تسلیم کیے جانے کی عکاسی کرتے ہیں۔