ایران نے امریکی طیاروں کو نشانہ بنانے کے لیے جدید فضائی دفاعی نظام نصب کردیا
دو روز میں بڑی کامیابی کے ساتھ امریکا کے تقریباً 7 طیاروں کو نشانہ بنایا ہے، ایرانی حکام
-
ویب ڈیسک -
تہران: ایران نے دعویٰ کیا ہے کہ اس نے امریکی طیاروں کو نشانہ بنانے کے لیے ایک جدید ترین فضائی دفاعی نظام نصب کردیا ہے۔
ایرانی حکام کے مطابق یہ نظام خاص طور پر ان امریکی طیاروں کو نشانہ بنانے کے لیے بنایا گیا ہے جو پہلے بچ نکلتے تھے۔
ایرانی حکام کا کہنا ہے کہ گزشتہ ایک دو روز میں انہوں نے بڑی کامیابی کے ساتھ امریکا کے تقریباً 7 طیاروں کو نشانہ بنایا ہے جن میں ہیلی کاپٹر اور ڈرون طیارے بھی شامل ہیں۔
حکام نے بتایا کہ جمعے کے روز اس نئے دفاعی نظام نے کامیابی سے امریکی طیاروں، ہیلی کاپٹروں اور ڈرونز کو نشانہ بنایا تاہم ایک امریکی پائلٹ ابھی تک لاپتہ ہے۔
ایرانی فوج کا کہنا ہے کہ ایک ماہ سے زائد عرصے تک جاری جنگ کے دوران امریکا اور اسرائیل کی فضائی برتری کے باوجود ایران اب اپنی فضائی حدود پر مکمل کنٹرول حاصل کرلے گا۔
یاد رہے کہ اس سے قبل امریکی صدر ڈونلڈ ٹرمپ اور وزیر دفاع پیٹ ہیگستھ نے ایران کی فضائی حدود پر مکمل کنٹرول کا دعویٰ کیا تھا تاہم ایرانی حکام کے حالیہ بیان نے ان دعوؤں کو غلط ثابت کردیا ہے۔
واضح رہے کہ 28 فروری کو شروع ہونے والی جنگ میں اب تک امریکا کے سات جنگی طیارے تباہ ہوچکے ہیں جسے ایران کی بڑی کامیابی قرار دیا جارہا ہے۔
