پاکستان نے ٹی ٹوئنٹی ورلڈکپ 2028 کے لیے براہ راست کوالیفائی کرلیا
2028 کے ورلڈکپ کی میزبانی مشترکہ طور پر آسٹریلیا اور نیوزی لینڈ کریں گے۔
-
ویب ڈیسک -
پاکستان نے آئندہ آئی سی سی ٹی ٹوئنٹی ورلڈکپ 2028 کے لیے براہ راست رسائی حاصل کرلی ہے۔
آئی سی سی کے طریقہ کار کے مطابق سپر 8 مرحلے میں پہنچنے والی ٹیموں کو 2028 کے ایونٹ میں براہ راست شرکت کا حق دیا گیا ہے۔ ان ٹیموں میں پاکستان کے علاوہ بھارت، انگلینڈ، نیوزی لینڈ، سری لنکا، زمبابوے، جنوبی افریقا اور ویسٹ انڈیز شامل ہیں۔
دوسری جانب 2028 کے ورلڈکپ کی میزبانی مشترکہ طور پر آسٹریلیا اور نیوزی لینڈ کریں گے۔ میزبان ہونے کے باعث آسٹریلیا نے بھی ایونٹ میں براہ راست جگہ حاصل کرلی ہے۔
آئی سی سی کے اعلان کے مطابق 9 مارچ تک کی عالمی رینکنگ میں سرفہرست تین بہترین ٹیمیں بھی براہ راست کوالیفائی کریں گی۔ اس معیار پر بنگلادیش، افغانستان اور آئرلینڈ کو بھی ایونٹ میں براہ راست رسائی مل گئی ہے۔
یوں مجموعی طور پر 12 ٹیمیں براہ راست 2028 کے ٹی ٹوئنٹی ورلڈکپ میں شریک ہوں گی جب کہ باقی آٹھ ٹیموں کا فیصلہ ریجنل کوالیفائرز کے ذریعے کیا جائے گا۔
کرکٹ شائقین کے لیے یہ خبر خوش آئند ہے کہ پاکستان ایک بار پھر عالمی ایونٹ میں براہ راست شرکت کرے گا اور شائقین کو قومی ٹیم سے عمدہ کارکردگی کی امید ہے۔
