قلات میں سیکیورٹی فورسز کا آپریشن؛ فتنہ الہندوستان کے 8 دہشتگرد ہلاک
بھارتی سپانسرڈ دہشتگرد علاقے میں دہشتگردی کی کئی کارروائیوں میں ملوث تھے۔
-
سلمان علی اعوان -
راولپنڈی: سیکیورٹی فورسز نے بلوچستان کے ضلع قلات میں انٹیلی جنس بیسڈ آپریشن کے دوران فتنہ الہندوستان کے 8 دہشت گردوں کو ہلاک کردیا۔
پاک فوج کے شعبہ تعلقات عامہ(آئی ایس پی آر) کے مطابق سیکیورٹی فورسز کی جانب سے یہ کارروائی بھارتی پراکسی تنظیم فتنہ الہندوستان سے تعلق رکھنے والے دہشت گردوں کی موجودگی کی اطلاع پر 24 دسمبر کو کی گئی۔
آپریشن کے دوران سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا، جس کے نتیجے میں فائرنگ کا شدید تبادلہ ہوا۔
آئی ایس پی آر کے مطابق کارروائی میں 8 بھارتی سپانسرڈ دہشت گرد ہلاک ہوگئے جبکہ ہلاک دہشت گردوں کے قبضے سے بھاری مقدار میں اسلحہ، گولہ بارود اور دھماکہ خیز مواد بھی برآمد کیا گیا۔
ترجمان پاک فوج نے بتایا کہ بھارتی سپانسرڈ دہشت گرد علاقے میں سیکیورٹی فورسز اور شہریوں کے خلاف متعدد دہشت گرد کارروائیوں میں ملوث تھے، تاہم علاقے کو مکمل طور پر کلیئر کرنے کے لیے سینیٹائزیشن آپریشن جاری ہیں۔
آئی ایس پی آر نے مزید کہا کہ سیکیورٹی فورسز عزم استحکام وژن کے تحت انسداد دہشت گردی کی کارروائیاں جاری رکھے ہوئے ہیں، پاکستان کی سیکیورٹی فورسز اور قانون نافذ کرنے والے ادارے غیر ملکی سپانسرڈ دہشت گردی کے خاتمے کے لیے کارروائیاں جاری رکھیں گے۔