نجکاری کمیشن آج پی آئی اے کے 75 فیصد حصص کی بولی کرے گا
نجکاری کا عمل تمام ٹی وی چینلز اور سرکاری میڈیا پر براہِ راست نشر کیا جائے گا
-
ویب ڈیسک -
نجکاری کمیشن نے اعلان کیا ہے کہ پاکستان انٹرنیشنل ایئرلائنز (PIA) کے 75 فیصد حصص کی نجکاری کے لیے آج بولی کا انعقاد کیا جائے گا۔
کمیشن کے مطابق سیل شدہ بولیاں صبح 10:30 بجے تک جمع کرائی جائیں گی، جبکہ بولیاں سہہ پہر 3:30 بجے بولی دہندگان کی موجودگی میں کھولی جائیں گی۔
بولیاں کھولنے کی تقریب میں ریفرنس قیمت اور موصولہ بولیوں کا اعلان کیا جائے گا۔ نجکاری کمیشن کے مطابق پی آئی اے کی ریفرنس قیمت کی حتمی منظوری بولیاں موصول ہونے کے بعد کابینہ کمیٹی برائے نجکاری دے گی۔
وزیراعظم کے مشیر برائے نجکاری محمد علی بولی کے اختتام پر پریس کانفرنس کریں گے اور نجکاری کے عمل کی تفصیلات سے میڈیا کو آگاہ کریں گے۔
کمیشن کا کہنا ہے کہ پی آئی اے کی نجکاری وزیراعظم شہباز شریف کے معاشی اصلاحاتی ایجنڈے کے تحت کی جا رہی ہے اور حکومت نجکاری کے عمل کو شفاف، قابل اعتماد اور ضابطوں کے مطابق مکمل کرنے کے لیے پرعزم ہے۔
نجکاری کا عمل تمام ٹی وی چینلز اور سرکاری میڈیا پر براہِ راست نشر کیا جائے گا تاکہ عوام اور سرمایہ کار مکمل شفافیت سے آگاہ رہیں۔
نجکاری کمیشن کے مطابق پی آئی اے کی یہ نجکاری ملک کی قومی ایئرلائن کو لیجنڈ کی شان سے واپسی دلانے کے لیے کی جا رہی ہے۔