جڑواں شہروں راولپنڈی اور اسلام آباد میں موسلادھار بارش کا سلسلہ وقفے وقفے سے جاری ہے، جس کے باعث نشیبی علاقوں میں پانی جمع ہونے لگا ہے جبکہ نالہ لئی میں پانی کی سطح خطرناک حد تک بلند ہو گئی ہے۔
ترجمان واسا کے مطابق اسلام آباد کے مختلف علاقوں میں ریکارڈ بارش ہوئی، جن میں پی ایم ڈی کے مقام پر 92 ملی میٹر، گولڑہ میں 66 ملی میٹر، بوکڑہ میں 44 ملی میٹر اور سیدپور میں 40 ملی میٹر بارش ریکارڈ کی گئی ہے۔
راولپنڈی کے علاقوں میں بھی مختلف مقامات پر بارش کا سلسلہ شدید رہا۔ ترجمان کے مطابق شمس آباد میں 25 ملی میٹر، پیر ودھائی میں 35 ملی میٹر، نیو کٹاریاں میں 60 ملی میٹر، گوالمنڈی اور چکلالہ میں 5 ملی میٹر بارش ریکارڈ کی گئی ہے۔
ایم ڈی واسا محمد سلیم اشرف کے مطابق نالہ لئی کی مسلسل مانیٹرنگ کی جا رہی ہے۔ کٹاریاں کے مقام پر پانی کی سطح 13 فٹ جبکہ گوالمنڈی کے مقام پر 4 فٹ تک جا پہنچی ہے۔ اس صورتحال کو دیکھتے ہوئے نالہ لئی اور ملحقہ علاقوں میں الرٹ جاری کر دیا گیا ہے۔
ایم ڈی واسا کا کہنا ہے کہ نالہ لئی کے اطراف میں رہنے والے افراد کو محفوظ مقامات پر منتقل ہونے کی ہدایت دی گئی ہے۔ واسا ہائی الرٹ پر ہے، رین ایمرجنسی نافذ کر دی گئی ہے، اور عملہ ہیوی مشینری کے ساتھ فیلڈ میں موجود ہے۔
ملکہ کوہسار مری میں بھی موسلا دھار بارش کا سلسلہ شروع ہو چکا ہے، جس سے موسم خوشگوار تو ہو گیا ہے لیکن دھند کی شدت سے حدِ نگاہ انتہائی کم ہو گئی ہے۔ محکمہ موسمیات کے مطابق مری میں بارش کا سلسلہ آئندہ چند گھنٹوں تک وقفے وقفے سے جاری رہے گا۔
محکمہ موسمیات نے نشیبی علاقوں اور نالہ لئی کے قرب و جوار میں رہائش پذیر شہریوں کو محتاط رہنے اور فوری طور پر انخلاء کی ہدایت جاری کر دی ہے۔ نالہ لئی میں پانی کی سطح مزید بلند ہونے کی پیش گوئی کی گئی ہے، جس سے سیلابی صورتحال پیدا ہو سکتی ہے۔
