رات 9:30 بجے تک تمام فیڈرز کی بحالی کی یقین دہانی، ممبر نیپرا کا کنٹرول روم کا دورہ، بجلی فراہمی اور شہری سلامتی پر اہم ہدایات جاری
شہرِ قائد میں شدید بارشوں کے بعد متعدد فیڈرز کی 30 گھنٹے سے زائد بندش پر کے-الیکٹرک کی کارکردگی پر سوالات اٹھنے لگے ہیں۔ ادارے نے نیپرا سے متاثرہ فیڈرز کی مکمل بحالی کے لیے مزید وقت مانگ لیا ہے۔
ترجمان نیپرا کے مطابق، ممبر نیپرا رفیق احمد شیخ نے کے-الیکٹرک کے سنٹرل کنٹرول روم کا دورہ کیا، جہاں انہیں سی ای او کے-
الیکٹرک اور کمپنی انتظامیہ کی جانب سے بارشوں کے دوران بجلی کی فراہمی، سسٹم کی بحالی اور موجودہ چیلنجز سے متعلق تفصیلی بریفنگ دی گئی۔
کے-الیکٹرک حکام نے ممبر نیپرا کو یقین دہانی کرائی کہ آج رات 9:30 بجے تک وہ تمام بند فیڈرز مکمل طور پر بحال کر دیے جائیں گے۔
اگر یہ ڈیڈ لائن پوری نہ ہوئی تو بعض علاقوں میں بجلی کی بندش 30 گھنٹے سے بھی تجاوز کر جائے گی۔
دورے کے دوران، ممبر نیپرا نے الیکٹریکل سیفٹی کو اولین ترجیح قرار دیتے ہوئے کے-الیکٹرک کو ہدایت کی کہ موجودہ ایمرجنسی صورتحال میں تمام تر دستیاب وسائل کو بروئے کار لایا جائے تاکہ شہریوں کی جان و مال کا تحفظ یقینی بنایا جا سکے۔
انہوں نے واضح کیا کہ عوام کی جان و مال پر کسی قسم کا سمجھوتہ برداشت نہیں کیا جائے گا۔
نیپرا کا کہنا ہے کہ وہ صورتحال پر کڑی نظر رکھے ہوئے ہے اور اگر وعدے کے مطابق بجلی بحال نہ کی گئی تو کے-الیکٹرک سے بازپرس کی جائے گی۔
شہری حلقوں نے تاخیر سے بحالی اور ناقص شکایتی نظام پر مایوسی کا اظہار کرتے ہوئے مطالبہ کیا ہے کہ بارشوں سے قبل ہنگامی منصوبہ بندی کیوں نہ کی گئی۔
