لاہور: معروف یوٹیوبر رجب بٹ کے گھر پر ہونے والی فائرنگ کا معمہ رات گئے چوہنگ پولیس نے حل کر لیا۔
پولیس نے کارروائی کرتے ہوئے واقعے میں ملوث مرکزی شوٹرز اور ان کے سہولت کاروں کو گرفتار کر لیا ہے۔
ترجمان پولیس کے مطابق فائرنگ کرنے والے افراد کی شناخت کاشف چوہان اور فرخ کے نام سے ہوئی ہے، جنہوں نے ابتدائی تفتیش میں اعتراف کیا ہے کہ انہوں نے یہ کارروائی شانی ٹائیگر نامی شخص کے کہنے پر انجام دی۔
پولیس کے مطابق واقعے میں موٹر سائیکل پر سوار شوٹرز کے ساتھ کار میں موجود دو دیگر ملزمان، عثمان اور لقمان بھی شامل تھے، جنہوں نے منصوبہ بندی میں اہم کردار ادا کیا۔
تحقیقات کے دوران انکشاف ہوا ہے کہ یوٹیوبر رجب بٹ کی سوشل میڈیا پر شہزاد بھٹی نامی نوجوان سے تلخ کلامی ہوئی تھی، جس کے بعد شہزاد بھٹی نے شانی ٹائیگر کو حملے کے لیے اکسانے کا کردار ادا کیا۔
پولیس نے ملزمان کو ویلنشیا اور دیگر علاقوں سے چھاپہ مار کارروائی کے دوران گرفتار کیا جبکہ واقعے کی مکمل چھان بین اور دیگر کرداروں کی تلاش کے لیے گرفتار افراد کو سی سی ڈی (کرائم اینڈ کرمنل ڈیٹیکشن یونٹ) کے حوالے کر دیا گیا ہے۔
حکام کے مطابق واقعے میں شامل دیگر ممکنہ ملزمان اور محرکات کی جانچ پڑتال بھی جاری ہے اور جلد مزید گرفتاریاں متوقع ہیں۔
