نائب وزیراعظم و وزیر خارجہ اسحاق ڈار دو روزہ سرکاری دورے پر بنگلہ دیش پہنچ گئے۔
ڈھاکہ کے حضرت شاہ جلال انٹر نیشنل ایئرپورٹ پر بنگلہ دیش کے سیکرٹری خارجہ ایمبیسیڈر اسد عالم سیام ، بنگلہ دیش میں پاکستان کے ہائی کمشنر عمران حیدر ، پاکستان میں بنگلہ دیش کے ہائی کمشنر محمد اقبال خان اور دیگر اعلیٰ حکام نے نائب وزیرِ اعظم کا استقبال کیا، جبکہ پاکستان ہائی کمیشن کے افسران بھی استقبال کیلئے موجود تھے۔
یہ بھی پڑھیں: پاک بنگلہ دیش تعلقات میں بڑی پیشرفت
یہ دورہ 23 تا 24 اگست بنگلہ دیش کی حکومت کی خصوصی دعوت پر کیا جا رہا ہے جس میں نائب وزیراعظم ڈھاکا میں اہم بنگلہ دیشی رہنماؤں سے ملاقاتیں کریں گے۔
اسحاق ڈار دورے کے دوران بنگلہ دیش حکومت کے چیف ایڈوائزر پروفیسر محمد یونس، مشیر خارجہ محمد، توحید حسین اور دیگر حکام سے اہم ملاقاتیں کریں گے، جس میں دوطرفہ تعلقات اور علاقائی و عالمی امور زیرِ بحث آئیں گے۔
اس موقع پر دونوں ممالک دو طرفہ تعاون بڑھانے کے لیے متعدد مفاہمت کی یادداشتوں پر دستخط بھی کریں گے۔
