پاکستان کی معروف اداکارہ صبا قمر جنہیں حال ہی میں اچانک طبیعت ناساز ہونے کے باعث ہنگامی طور پر اسپتال منتقل کیا گیا تھا، تاہم اب انہوں نے مداحوں کو اپنی صحت سے متلعق آگاہ کردیا ہے۔
صبا قمر نے اپنی تازہ طبیعت سے متعلق اپ ڈیٹ انسٹاگرام پر شیئر کی اور بتایا کہ گزشتہ 10 سے 14 دنوں کے مسلسل آرام کے بعد وہ بہتر محسوس کر رہی ہیں، تاہم مکمل صحت یابی ابھی باقی ہے۔
ساتھ ہی انہوں نے اعلان کیا کہ آج سے کام کا سلسلہ دوبارہ شروع ہو رہا ہے، اپنے نئے پروجیکٹ “وش می لک” کے لیے بہت پرجوش ہوں۔
اداکارہ نے اپنے مداحوں سے کہا کہ مجھے اپنی دعاؤں میں یاد رکھیں تاکہ میں اپنی ذمہ داریوں کو بہتر طریقے سے نبھا سکوں اور اپنی پوری محنت سے کام کر سکوں، میں اسی طرح اپنی زندگی بھر آپ کو تفریح فراہم کرتی رہوں گی۔
واضح رہے کہ چند روز قبل صبا قمر کو دل کی تکلیف کی وجہ سے ہنگامی حالت میں اسپتال منتقل کیا گیا تھا، جس کے بعد انہوں نے سوشل میڈیا پر اپنی خیریت کی اطلاع دی اور مداحوں کا شکریہ ادا کیا تھا۔