خیبر پختونخواہ میں ایک افسوسناک حادثہ پیش آیا ہے، جس میں صوبائی حکومت کا ایم آئی 17 ہیلی کاپٹر خراب موسم کے باعث باجوڑ کے بارشوں سے متاثرہ علاقوں کے لئے امدادی سامان لے جاتے ہوئے کریش کر گیا۔
اس دل دہلا دینے والے حادثے کے نتیجے میں دو پائلٹوں سمیت عملے کے پانچ افراد شہید ہو گئے ہیں۔
وزیر اعلیٰ خیبر پختونخواہ نے اس سانحے پر گہرے دکھ کا اظہار کرتے ہوئے اعلان کیا ہے کہ صوبے میں کل سوگ منایا جائے گا۔ صوبے میں قومی پرچم سرنگوں رہے گا اور شہداء کی تدفین سرکاری اعزاز کے ساتھ کی جائے گی۔
مزید پڑھیں: خیبر پختونخوا میں بارشوں اور سیلاب سے 157 افراد جاں بحق، ریسکیو میں مصروف ہیلی کاپٹر تباہ، 5 افراد شہید
وزیر اعلیٰ نے کہا کہ ہیلی کاپٹر کے عملے نے دوسروں کی جانیں بچانے کے لئے اپنی جانوں کا نذرانہ پیش کیا۔ یہ ہمارے اصل ہیرو ہیں اور ان کی قربانی تاریخ میں سنہری حروف میں لکھی جائے گی۔
علی امین گنڈاپور نے کہا کہ شہداء کے اہل خانہ کے غم میں ہم برابر کے شریک ہیں اور ان کے درجات کی بلندی اور پسماندگان کے لیے صبر جمیل کی دعا کرتے ہیں۔
حادثے کی جگہ پر امدادی ٹیمیں روانہ کر دی گئی ہیں اور شہداء کے جسد خاکی کو سرکاری اعزاز کے ساتھ دفن کرنے کا عمل جاری ہے۔
یہ سانحہ نہ صرف خیبر پختونخواہ بلکہ پورے ملک کے لیے ایک بڑا دھچکا ہے، جس میں ایم آئی 17 ہیلی کاپٹر کا عملہ اپنی جانوں کا نذرانہ دے کر دوسروں کی زندگیوں کو بچانے کی کوشش میں جان سے ہاتھ دھو بیٹھا۔ ان کی قربانی ہمیشہ یاد رکھی جائے گی۔