صوفی شاعر حضرت شاہ عبدالطیف بھٹائی کے عرس کے موقع پر آج صوبہ سندھ بھر کی عدالتوں میں تعطیل ہے۔
رجسٹرار سندھ ہائی کورٹ کے جاری کردہ نوٹیفکیشن کے مطابق سندھ ہائی کورٹ پرنسپل سیٹ کراچی، سکھر بینچ، سرکٹ کورٹس حیدرآباد، لاڑکانہ اور میرپورخاص میں آج کام نہیں ہوگا۔
نوٹیفکیشن میں بتایا گیا ہے کہ صوبے بھر کی سیشن عدالتیں، سول عدالتیں، وفاقی و صوبائی ٹریبونلز اور خصوصی عدالتوں میں بھی آج تعطیل ہوگی۔
مزید پڑھیں: حضرت شاہ عبدالطیف بھٹائیؒ کا 280 واں عرس مبارک آج سے شروع
واضح رہے کہ سندھ کے لازوال مفکر، عظیم صوفی شاعر اور بزرگ حضرت شاہ عبداللطیف بھٹائیؒ کے 282ویں سالانہ تین روزہ عرس مبارک آج سے شروع ہوگا، جس کا افتتاح گورنر کے پی کے فیصل کریم کنڈی درگاہ شریف پر چادر چڑھا کر کریں گے، جبکہ اس موقع پر 5 لاکھ سے زائد افراد کی آمد متوقع ہے۔
ایس ایس پی مٹیاری کا کہنا ہے کہ زائرین کی حفاظت کو یقینی بنانے کے لیے 2688 پولیس اہلکار تعینات کیے گئے ہیں، جب کہ 100 لیڈی پولیس اہلکار بھی موجود ہوں گی، اس کے علاوہ 200 رینجرز کو بھی ہائی الرٹ رکھا جائے گا۔
عرس مبارک کی تمام سرگرمیوں کو چھ سیکٹرز میں تقسیم کیا گیا ہے، 37 مقامات کی نشاندہی کی گئی ہے، جہاں 24 گھنٹے پولیس کی مانیٹرنگ ہوگی، مختلف جگہوں پر 5 واک تھرو گیٹ لگائے جائیں گے جبکہ ایک کنٹرول روم قائم کرکے تمام سرگرمیوں کی CCTV کیمروں سے سخت نگرانی کی جائے گی۔
