اسلام آباد: یومِ شہداء پولیس پر وزیراعظم شہباز شریف نے خراجِ تحسین پیش کرتے ہوئے کہا کہ پولیس کے 8 ہزار سے زائد شہداء قوم کا فخر ہیں۔
وزیراعظم شہباز شریف نے یومِ شہداءِ پولیس کے موقع پر پیغام دیتے ہوئے کہا کہ آج کے دن ہم اپنی پولیس کے بہادر افسران و جوانوں کو خراج تحسین پیش کرتے ہیں، جو ملک کے کونے کونے میں موسمی حالات کی پرواہ کیے بغیر فرض کی ادائیگی میں سرگرم عمل رہتے ہیں۔
انہوں نے کہا کہ پولیس کے جوان اپنی جانوں کا نذرانہ پیش کرتے ہیں، ہم اپنے شہداء کے ان عظیم اہل خانہ کو بھی سلام کرتے ہیں جو ہماری خاطر اپنا مستقبل قربان کرتے ہیں۔
شہباز شریف نے کہا کہ دہشتگردی کی جنگ میں 8 ہزار سے زائد پولیس کے افسران و جوانوں نے ارض وطن کی خاطر اپنے لہو کا نذرانہ پیش کیا، بطور فرنٹ لائن دفاعی فورس اپنے بچوں کو یتیم کرکے ملک کے لاکھوں بچوں کو یتیمی سے بچایا۔
انکا کہنا تھا کہ حال ہی میں رحیم یار خان میں ڈاکوؤں کے خلاف کارروائی کرتے ہوئے الیٹ فورس کے 5 جوانوں نے جام شہادت نوش کیا، ان شہداء سمیت پولیس کے ہزاروں شہداء ہمارا فخر ہیں۔
وزیراعظم نے کہا کہ پاکستان پولیس نے اپنی پیشہ ورانہ صلاحیتوں کا پوری دنیا میں لوہا منوایا، حال ہی میں ورلڈ پولیس سمٹ 2025 میں بین الاقوامی سطح پر جیتے گئے میڈل و ایوارڈز اس کا منہ بولتا ثبوت ہیں۔
انہوں نے کہا کہ شہری امن و امان کے قیام و جرائم کی مؤثر روک تھام کیلئے پولیسنگ میں جدید ٹیکنالوجی کا استعمال خوش آئند ہے، جس سے شہریوں کی حفاظت مزید مؤثر اور یقینی بنائی جا سکے گی۔
شہباز شریف نے کہا کہ انسداد دہشتگردی فورسز کے قیام، افواجِ پاکستان و رینجرز کے ساتھ مشترکہ کاروائیوں و تعاون، قدرتی آفات و دیگر ہنگامی صورتحال میں پولیس کا کردار کلیدی رہا ہے جس کی بدولت شہریوں کا پولیس کے حوالے سے نقطہ نظر بہتر اور پولیس کی کارکردگی میں نمایاں بہتری آئی ہے۔
وزیراعظم نے مزید کہا کہ گزشتہ برسوں میں پولیس نے دہشتگردی کی جنگ میں سینکڑوں آپریشنز کے ذریعے دشمن کے پاکستان میں بد امنی اور شر انگیزی کے ناپاک عزائم کو خاک میں ملایا، گوادر کے ساحلوں سے گلگت بلتستان کے فلک بوس پہاڑوں تک ملک کی حفاظت پر مامور پولیس کا ہر افسر جوان مجھ سمیت پوری قوم کا فخر ہے۔
