لیجنڈز لیگ کا شیر فائنل سے باہر

لیجنڈز لیگ کا شیر مایہ ناز آل راؤنڈر شاہد خان آفریدی ورلڈ چیمپئن شپ آف لیجنڈز (WCL) 2025 کے فائنل سے باہر ہوگئے ہیں۔

پاکستان چیمپئنز کے مایہ ناز آل راؤنڈر شاہد خان آفریدی نے لیجنڈز لیگ کے فائنل میچ سے انجری کے باعث دستبردار ہونے کا اعلان کر دیا ہے۔ جس کے بعد آج پاکستان چیمپئنز شاہد آفریدی کے بغیر ایجبسٹن میں جنوبی افریقہ کے خلاف فائنل کھیلیں گے۔

شاہد آفریدی نے مانچسٹر میں پریس کانفرنس کرتے ہوئے تصدیق کی کہ ڈاکٹروں نے انہیں مکمل آرام کا مشورہ دیا ہے، جس کے باعث وہ فائنل میں شرکت نہیں کر سکیں گے۔ انہوں نے کہا کہ اگر سیمی فائنل میں پاکستان کا مقابلہ بھارت سے ہوتا تو شاید وہ درد برداشت کر کے کھیلنے کی کوشش کرتے، مگر صحت اولین ترجیح ہے۔

مزید پڑھیں: چیمپئنز ٹرافی میں پاکستان کو تینوں شعبے میں پرفارمنس دکھانی ہوگی، شاہد آفریدی

شاہد آفریدی نے اپنے جذبات کا اظہار کرتے ہوئے کہا کہ میں لڑکوں کو ہمیشہ یاد دلاتا ہوں کہ وہ پاکستان کی نمائندگی کر رہے ہیں۔ یہ جرسی ہمارا فخر ہے اور یہاں کوئی کمرشل لیگ نہیں ہو رہی، ہم قومی وقار کے لیے کھیل رہے ہیں۔

پاکستان چیمپئنز نے گروپ اسٹیج میں ناقابلِ شکست رہتے ہوئے سیمی فائنل میں بھارت چیمپئنز کے فورفیٹ کے بعد فائنل میں جگہ بنائی۔ آفریدی نے ٹیم کے عزم اور کارکردگی کو سراہتے ہوئے کہا کہ ہر کھلاڑی اس ذمہ داری کو محسوس کرتا ہے کہ وہ پاکستان کے لیے کھیل رہا ہے۔

ایجبسٹن میں ہونے والے فائنل میچ کے دوران اگرچہ شاہد آفریدی میدان میں موجود نہیں ہوں گے، لیکن ان کا تجربہ، قیادت اور حوصلہ افزائی ٹیم کا حوصلہ بلند رکھے گی۔