خلیجی میڈیا نے ایک غیر ملکی خبر رساں ادارے کی خبر کے حوالے سے بتایا ہے کہ اسرائیل نے غزہ میں فضائی امداد کی اجازت دینے کا عندیہ دے دیا ہے۔
رپورٹس کے مطابق اسرائیلی آرمی ریڈیو نے ایک فوجی عہدیدار کے حوالے سے اطلاع دی ہے کہ اسرائیل جمعہ سے غیر ملکی ممالک کو غزہ میں فضائی طور پر امداد گرانے (ایئر ڈراپ) کی اجازت دے گا۔
ابھی تک اسرائیلی فوج کے ترجمان نے غیر ملکی خبر رساں ادارے کی جانب سے تصدیق کے لیے بھیجے گئے سوال پر کوئی ردِعمل نہیں دیا۔
یہ پیش رفت ایک ایسے وقت میں سامنے آئی ہے جب غزہ میں جاری انسانی بحران کے باعث عالمی برادری امدادی رسائی بڑھانے پر زور دے رہی ہے۔
اگر اس فیصلے کی تصدیق ہو جاتی ہے، تو یہ محصور علاقے میں غذائی و طبی امداد پہنچانے کی ایک نئی راہ ہموار کر سکتی ہے۔