غزہ کی ناکہ بندی فوری ختم کی جائے،اسحاق ڈار، سلامتی کونسل سے خطاب

غزہ کی ناکہ بندی فوری ختم کی جائے،اسحاق ڈار کا سلامتی کونسل کے اجلاس سے خطاب،مسئلہ کشمیربھی اٹھادیا۔

نائب وزیراعظم پاکستان نے مطالبہ کیا ہے کہ مسئلہ کشمیر کو اقوام متحدہ کی قراردادوں کے مطابق حل کیا جائے۔

یہ مطالبہ انہوں نے اقوام متحدہ کی سلامتی کونسل سے خطاب میں کیا۔ انہوں نے غزہ کی ناکہ بندی فوری ختم  اور غیر مشروط جنگ بندی کا سختی سے مطالبہ کیا۔

ان کاکہناتھاکہ فلسطین اورمقبوضہ کشمیرجیسے تنازعات کافوری اور منصفانہ حل نکالنا عالمی امن کے لیے ناگزیرہے۔

اسحاق ڈار نے کہا کہ اسرائیل کے وحشیانہ حملوں میں اب تک 58 ہزار سے زائد فلسطینی شہید ہو چکے ہیں۔ ان کاکہناتھاکہ اکثریت خواتین اور بچوں کی ہے۔

انہوں نے زور دیا کہ عالمی برادری ان مظالم پر خاموشی ترک کرے۔نائب وزیراعظم  نے کہا کہ پاکستان صرف اپنے خطے ہی نہیں بلکہ دنیا بھر میں امن کا خواہاں ہے۔

اسحاق ڈار نے خطے میں امن کے لیے پاکستان کی یکطرفہ کوششوں کو ناکافی قراردیا۔

نائب وزیراعظم نے پھر کہاکہ مسئلہ کشمیرکا حل کشمیری عوام کی خواہشات کے مطابق ہونا چاہیے۔ انہوں نے یاد دلایا کہ اقوام متحدہ نے بھی کشمیریوں کے حقِ خودارادیت کو تسلیم کر رکھا ہے۔

اسحاق ڈار نے بھارت کی جانب سے سندھ طاس معاہدے کو یکطرفہ طور پر معطل کرنے پر تشویش ظاہرکی۔ انہوں نے کہا کہ یہ معاہدہ دونوں ممالک کے درمیان 65 سال پرانا اور انتہائی اہم ہے۔

ان کاکہناتھاکہ بھارت نے غیرقانونی طور پر 240 ملین پاکستانیوں کا پانی روکنے کی بات کی ہے جو قابل مذمت ہے۔

نائب وزیراعظم نے کہاکہ پاکستان اقوام متحدہ کے چارٹر اور عالمی قوانین کے مطابق اپنا کردار ادا کرتا رہے گا۔

انہوں نے سلامتی کونسل کی جانب سے تنازعات کے پرامن حل سے متعلق قراردادکی منظوری کوخوش آئند قراردیا۔