اسلام آباد: محکمہ موسمیات نے ملک بھر میں مون سون سیزن کے دوران شدید بارشوں کی پیش گوئی کرتے ہوئے عوام کو احتیاط برتنے کی ہدایت کی ہے۔
محکمہ موسمیات کے مطابق آئندہ دنوں میں متوقع موسلادھار بارشوں کے نتیجے میں مختلف علاقوں میں لینڈ سلائیڈنگ، ٹریفک حادثات، درختوں کے گرنے اور ندی نالوں میں طغیانی کا خطرہ موجود ہے، جس کے پیش نظر شہریوں خصوصاً سیاحوں کو غیر ضروری سفر سے گریز کرنے کا مشورہ دیا گیا ہے۔
ترجمان کا کہنا ہے کہ بارشوں کے دوران نقل و حمل کے نظام میں خلل پڑ سکتا ہے، جس سے سڑکیں بند ہونے، ٹریفک جام اور دیگر مسائل پیدا ہو سکتے ہیں، ایسے میں شہریوں کو چاہیے کہ وہ دریاؤں، ندی نالوں یا پہاڑی علاقوں کے قریب نہ جائیں۔
سیاحتی مقامات کا رخ کرنے والے افراد سے کہا گیا ہے کہ وہ موجودہ موسمی حالات کو مدنظر رکھتے ہوئے سفر کی منصوبہ بندی کریں اور ممکنہ خطرات سے بچاؤ کے لیے ضروری احتیاطی تدابیر اختیار کریں۔
مزید یہ کہ ملک بھر میں ریسکیو اور ایمرجنسی اداروں کو ہائی الرٹ کر دیا گیا ہے تاکہ کسی بھی ہنگامی صورتحال میں فوری مدد فراہم کی جا سکے۔
انتظامیہ کی جانب سے ہدایت کی گئی ہے کہ شہری ہر ممکن طور پر تازہ ترین موسم سے باخبر رہیں اور ہنگامی حالات میں مقامی انتظامیہ کی ہدایات پر عمل کریں۔
