ڈیوڈ وارنر کی ایک غلطی نے سب کچھ داؤ پر لگا دیا، کپتانی چھننے کا خطرہ منڈلانے لگا

ڈیوڈ وارنر کی ایک غلطی نے سب کچھ داؤ پر لگا دیا، کپتانی چھننے کا خطرہ منڈلانے لگا

اپنے فیصلے پر شرمندہ ہوں اور قانون کے سامنے جواب دہ ہونے کے لیے تیار ہوں، ڈیوڈ وارنر

آسٹریلوی کرکٹ کے معروف نام ڈیوڈ وارنر ایک بار پھر میدان کے بجائے عدالتی کارروائی کے باعث خبروں کی زینت بن گئے۔ اس بار معاملہ کرکٹ نہیں بلکہ شراب پی کر گاڑی چلانے کا ہے، جس کے بعد نہ صرف ان کی ساکھ بلکہ سڈنی تھنڈرز کی قیادت بھی سوالیہ نشان بن گئی ہے۔

ویورلے لوکل کورٹ میں وارنر کے وکیل نے عدالت کو بتایا کہ سابق آسٹریلوی اوپنر نے مڈ رینج ڈرنک ڈرائیونگ کے الزام کو تسلیم کر لیا ہے۔ وارنر خود عدالت میں پیش نہیں ہوئے، تاہم ان کی جانب سے واضح کیا گیا کہ وہ اپنے فیصلے پر شرمندہ ہیں اور قانون کے سامنے جواب دہ ہونے کے لیے تیار ہیں۔

پولیس کے مطابق اپریل میں سڈنی کے مشرقی علاقے میں معمول کی چیکنگ کے دوران وارنر کو روکا گیا۔ بعد ازاں کیے گئے ٹیسٹ میں ان کے خون میں الکحل کی مقدار 0.104 ریکارڈ ہوئی جو مقررہ قانونی حد سے دوگنا سے بھی زیادہ تھی۔ وارنر نے مبینہ طور پر ایک دوست کے گھر چند گلاس شراب پینے کے بعد خود گاڑی چلانے کا فیصلہ کیا جسے ان کے وکیل نے ایک سنگین غلطی قرار دیا۔

اس مقدمے میں سزا کا اعلان 18 اگست کو متوقع ہے، لیکن اس سے پہلے ہی کرکٹ حلقوں میں یہ بحث زور پکڑ چکی ہے کہ آیا سڈنی تھنڈرز انہیں بطور کپتان برقرار رکھے گی یا نہیں۔ کرکٹ نیو ساؤتھ ویلز نے بھی واضح کیا ہے کہ شراب پی کر ڈرائیونگ کے خلاف ادارے کی پالیسی انتہائی سخت ہے۔

یوں ایک لمحے کا غلط فیصلہ ڈیوڈ وارنر کے لیے صرف قانونی مشکل نہیں بلکہ ان کی قائدانہ حیثیت اور پیشہ ورانہ ساکھ کے لیے بھی بڑا امتحان بن گیا ہے، جس کا حتمی منظر اب عدالت اور کرکٹ حکام کے فیصلوں کے بعد ہی سامنے آئے گا۔