عالمی مارکیٹ میں خام تیل کی قیمتوں میں غیر معمولی اتار چڑھاؤ کے باعث نمایاں کمی
عالمی سطح پر قدرتی گیس کی قیمت 2.8 ڈالر فی ایم ایم بی ٹی یو ریکارڈ کی گئی ہے
-
ویب ڈیسک -
عالمی مارکیٹ میں خام تیل کی قیمتوں میں اتار چڑھاؤ جاری ہے تاہم تازہ کاروباری صورتحال میں خام تیل کی قیمتوں میں نمایاں کمی ریکارڈ کی گئی ہے۔
عالمی مارکیٹ میں برینٹ کروڈ کی قیمت 83 ڈالر فی بیرل جبکہ ڈبلیو ٹی آئی کروڈ 78 ڈالر فی بیرل کی سطح پر آگیا ہے۔
رپورٹس کے مطابق مربان کروڈ کی قیمت میں بھی تقریباً ڈھائی فیصد کمی ہوئی جس کے بعد یہ 78 ڈالر فی بیرل پر ٹریڈ کر رہا ہے۔
اس سے قبل عالمی مارکیٹ میں برینٹ کروڈ 85 ڈالر فی بیرل اور ڈبلیو ٹی آئی کروڈ 80 ڈالر فی بیرل تک پہنچ گیا تھا جبکہ مربان کروڈ کی قیمت 79.4 ڈالر فی بیرل ریکارڈ کی گئی تھی۔
دوسری جانب عالمی سطح پر قدرتی گیس کی قیمت 2.8 ڈالر فی ایم ایم بی ٹی یو ریکارڈ کی گئی ہے۔
ماہرین کے مطابق عالمی مارکیٹ میں خام تیل کی قیمتوں میں کمی کا اثر درآمدی بل اور مقامی پٹرولیم مصنوعات کی قیمتوں پر پڑ سکتا ہے تاہم اس کا حتمی اثر عالمی رجحانات، شرح تبادلہ اور حکومتی فیصلوں پر منحصر ہوگا۔
