ویڈیو اسسٹنٹ ریفری کے متنازعہ فیصلوں نے فیفا ورلڈ کپ 2026 کو داغدار کر دیا
متنازع فیصلے شائقین اور ٹیموں دونوں کے لیے بحث کا مرکز بنے ہوئے ہیں
-
ویب ڈیسک -
ورلڈ کپ 2026 کے گروپ اسٹیج میں ویڈیو اسسٹنٹ ریفری (VAR) کے متعدد متنازع فیصلے شدید تنازعات کا باعث بن گئے ہیں جنہوں نے نہ صرف میچز کے نتائج بلکہ بعض ٹیموں کی ناک آؤٹ مرحلے تک رسائی کو بھی متاثر کیا۔
سب سے بڑا تنازع ایران اور مصر کے درمیان 1-1 سے برابر رہنے والے میچ میں سامنے آیا جہاں اضافی وقت کے تیسرے منٹ میں ایران کے شو جا خلیل زادے کا فیصلہ کن گول VAR چیک کے بعد آف سائیڈ قرار دے دیا گیا۔
سیئٹل اسٹیڈیم میں جشن منانے والے ایرانی کھلاڑی اور شائقین اس وقت شدید مایوسی کا شکار ہوگئے جب ریپلے میں یہ فیصلہ انتہائی معمولی یعنی چند ملی میٹر کے فرق سے ثابت ہوا کہ کھلاڑی آف سائیڈ تھا۔
اسی طرح کولمبیا اور پرتگال کے میچ میں ڈافنسن سانچیز نے آخری لمحات میں ہیڈر کے ذریعے گول اسکور کیا تاہم لائن مین نے فوراً آف سائیڈ کا جھنڈا بلند کردیا۔ ری پلے میں یہ فیصلہ ایک ٹو کے معمولی فرق سے سامنے آیا، جس نے کولمبیا کی جیت کی امیدوں کو خاک میں ملا دیا۔
دوسری جانب گھانا اور انگلینڈ کے میچ میں ایک متنازعہ پنالٹی فیصلہ سامنے آیا۔ 79ویں منٹ میں گھانا کے کھلاڑی پر دفاعی کھلاڑی کی جانب سے مبینہ فاؤل کے باوجود ریفری نے پنالٹی نہ دی جس پر گھانا ٹیم اور کوچنگ اسٹاف نے سخت اعتراض کیا۔ کوچ نے طنزیہ انداز میں کہا کہ VAR کافی پینے چلا گیا تھا۔
برازیل اور اسکاٹ لینڈ کے میچ میں بھی تنازع دیکھنے میں آیا جب ونیسیئس جونیئر کا گول VAR ریویو کے بعد فاؤل قرار دے کر رد کردیا گیا۔ برازیلین فٹبال حکام نے بعد میں فیفا کو خط لکھ کر VAR کے معیار اور یکسانیت پر سوالات اٹھائے۔
جرمنی اور ایکواڈور کے میچ میں بھی ابتدائی گول پر بحث جاری ہے جہاں جرمن کھلاڑی لیرائے سانی کا گول برقرار رکھا گیا تاہم اس سے قبل ہونے والے ایک ہائی بوٹ فاؤل پر VAR نے مداخلت نہیں کی جس پر ایکواڈور نے شدید اعتراض کیا۔
ورلڈ کپ 2026 کے اس گروپ مرحلے میں VAR کے فیصلے شائقین اور ٹیموں دونوں کے لیے بحث کا مرکز بنے ہوئے ہیں جہاں چند ملی میٹر اور ریویو روم کے فیصلے کئی میچز کی کہانی بدلتے دکھائی دے رہے ہیں۔