پاکستانی شوبز انڈسٹری کی معروف اداکارہ سجل علی نے اپنے شوبز کیریئر اور اداکاری کے تجربے کے حوالے سے گفتگو کرتے ہوئے کہا ہے کہ اداکاری مجھے ذاتی آزادی اور اظہارِ خیال کا بھرپور موقع فراہم کرتی ہے۔
سجل علی نے حال ہی میں ایک میک اپ ماسٹر کلاس میں بطور مہمان شرکت کی جہاں انہوں نے مختلف موضوعات پر کھل کر گفتگو کی۔
اپنے کیریئر کے بارے میں بات کرتے ہوئے انہوں نے کہا کہ مجھے نہیں لگتا کہ میرے لیے اداکاری سے بہتر کوئی اور پیشہ ہو سکتا ہے کیونکہ یہ فن مجھے اپنے جذبات کو مختلف انداز میں سمجھنے اور پیش کرنے کا موقع دیتا ہے۔
اداکارہ کا کہنا تھا کہ اداکاری کے ذریعے مجھے ایسے احساسات اور جذبات کو محسوس کرنے کا موقع ملا جن کے اظہار کو اکثر سماجی توقعات محدود کر دیتی ہوں۔
انہوں نے مزید کہا کہ ہنسنے، بولنے اور اظہار کرنے کے مختلف انداز اپنانا اداکاری کا حصہ ہے اور یہ پیشہ مجھے وہ آزادی دیتا ہے جو عام زندگی میں ہر کسی کو مکمل طور پر حاصل نہیں ہو پاتی۔