ڈھاکا ٹیسٹ پاکستان کو مہنگا پڑ گیا، آئی سی سی نے جرمانے کے ساتھ قیمتی پوائنٹس بھی چھین لیے
پوائنٹس کی کٹوتی کے بعد پاکستان کی پوزیشن ورلڈ ٹیسٹ چیمپئن شپ ٹیبل پر مزید متاثر ہوئی ہے
-
ویب ڈیسک -
انٹرنیشنل کرکٹ کونسل نے ڈھاکا ٹیسٹ میں سلو اوور ریٹ پر پاکستان کرکٹ ٹیم کے خلاف سخت کارروائی کرتے ہوئے قومی ٹیم پر بھاری جرمانہ عائد کر دیا۔
بنگلادیش کے خلاف پہلے ٹیسٹ میچ میں مقررہ وقت کے اندر اوورز مکمل نہ کرنے پر پاکستان ٹیم آٹھ اوورز پیچھے رہی جس کے بعد آئی سی سی نے میچ فیس کا 40 فیصد جرمانہ اور آئی سی سی ورلڈ ٹیسٹ چیمپئن شپ کے آٹھ اہم پوائنٹس بھی کاٹ لیے۔
پوائنٹس کی کٹوتی کے بعد پاکستان کی پوزیشن ورلڈ ٹیسٹ چیمپئن شپ ٹیبل پر مزید متاثر ہوئی ہے اور ٹیم صرف چار پوائنٹس کے ساتھ آٹھویں نمبر پر پہنچ گئی ہے۔
یہ سزا آئی سی سی ایلیٹ پینل کے میچ ریفری جیف کرو نے سنائی۔ آئی سی سی قوانین کے تحت مقررہ ہدف سے ہر ایک اوور کم ہونے پر پانچ فیصد میچ فیس جرمانہ اور ایک چیمپئن شپ پوائنٹ کی کٹوتی کی جاتی ہے۔
قومی ٹیم کے کپتان شان مسعود نے ٹیم کی غلطی تسلیم کرتے ہوئے مجوزہ سزا قبول کر لی، جس کے باعث معاملے میں باقاعدہ سماعت کی ضرورت پیش نہیں آئی۔
