لبنانی وزیراعظم نے اسرائیل پر حزب اللہ کے راکٹ حملے کو غیرذمہ دارانہ قرار دے دیا
لبنانی عوام کے جان و مال کے تحفظ کے لیے تمام ضروری اقدامات کیے جائیں گے
-
ویب ڈیسک -
لبنان کے وزیراعظم نواف سلام نے اسرائیل پر حزب اللہ کے حالیہ راکٹ حملے کو غیر ذمہ دارانہ اقدام قرار دیتے ہوئے کہا ہے کہ اس طرح کی کارروائیاں ملک کی سلامتی کو شدید خطرات سے دوچار کر سکتی ہیں۔
اپنے بیان میں لبنانی وزیراعظم نے کہا کہ حزب اللہ کے اس حملے نے اسرائیل کو لبنان کے خلاف جارحیت جاری رکھنے کا بہانہ فراہم کیا ہے، جس کے نتائج پورے ملک کو بھگتنا پڑ سکتے ہیں۔
انہوں نے واضح کیا کہ لبنان کو کسی بھی غیر ضروری مہم جوئی میں دھکیلنے کی اجازت نہیں دی جا سکتی اور ریاست اپنی خودمختاری اور قومی مفادات کے تحفظ کے لیے پرعزم ہے۔
نواف سلام کا مزید کہنا تھا کہ لبنانی عوام کے جان و مال کے تحفظ کے لیے تمام ضروری اقدامات کیے جائیں گے اور ملک کو کسی بڑے تنازع میں جھونکنے کی ہر کوشش کو روکا جائے گا۔