رواں مالی سال کے ابتدائی 7 ماہ؛ سونے کی درآمدات میں بڑی کمی ریکارڈ
گزشتہ مالی سال کے اسی عرصے میں 303 کلو گرام سونا درآمد کیا گیا تھا
-
کفیل احمد -
اسلام آباد: رواں مالی سال کے ابتدائی سات ماہ (جنوری تا جولائی) کے دوران سونے کی درآمدات میں بڑی کمی ریکارڈ کی گئی ہے۔
اعداد و شمار کے مطابق اس عرصے میں سونے کی درآمدات میں 71.23 فیصد کمی واقع ہوئی۔ رواں مالی سال کے پہلے سات ماہ میں مجموعی طور پر 45 کلو گرام سونا درآمد کیا گیا جبکہ اس کا درآمدی بل 17 لاکھ 85 ہزار ڈالر ریکارڈ کیا گیا۔
اس کے برعکس گزشتہ مالی سال کے اسی عرصے میں 303 کلو گرام سونا درآمد کیا گیا تھا اور درآمدی بل 2 کروڑ 21 لاکھ ڈالر تک پہنچا تھا۔
سرکاری دستاویزات کے مطابق صرف جنوری کے مہینے میں مقدار کے لحاظ سے سونے کی درآمدات میں سالانہ بنیاد پر 33.15 فیصد کمی دیکھنے میں آئی، جنوری کے دوران 18 کلو گرام سونا درآمد کیا گیا، جس کا حجم 26 لاکھ 35 ہزار ڈالر رہا۔
اس کے علاوہ گزشتہ مالی سال جنوری میں 27 کلو گرام سونا درآمد کیا گیا تھا، جس کی مالیت 37 لاکھ 28 ہزار ڈالر تھی۔
ماہرین کے مطابق سونے کی درآمدات میں کمی کی ممکنہ وجوہات میں عالمی قیمتوں میں اتار چڑھاؤ، ڈالر کی قدر میں اضافہ اور درآمدی پالیسی میں سختی شامل ہو سکتی ہے۔