موسم سرما کے آغاز کے ساتھ ہی کراچی میں گیس کی بندش؛ شہری پریشان

موسم سرما کے آغاز کے ساتھ ہی شہرِ قائد میں جمشید روڈ، جہانگیر روڈ اور مارٹن کوارٹرز کے مکین بدستور غیر اعلانیہ گیس لوڈ شیڈنگ کا سامنا کر رہے ہیں، جس سے شہریوں کی مشکلات میں مزید اضافہ ہوگیا ہے۔

متاثرہ علاقوں کے رہائشیوں کا کہنا ہے کہ گھروں میں گیس نہ ہونے کے باعث معمولاتِ زندگی بری طرح متاثر ہو رہے ہیں۔

ایک خاتون نے شکایت کی کہ ہمارے علاقے میں تو گیس آتی ہی نہیں جبکہ دوسری شہری نے بتایا کہ ہم لکڑیوں پر کھانا پکانے پر مجبور ہو گئے ہیں۔

 ایک اور خاتون نے کہا کہ سیلنڈر پر کب تک کھانا بنائیں، یہ بہت مہنگا پڑتا ہے۔

اہلِ علاقہ کا یہ بھی کہنا ہے کہ گیس نہ ملنے کے باوجود ہر ماہ باقاعدگی سے بل موصول ہو رہا ہے، جس پر انہوں نے شدید برہمی کا اظہار کیا ہے۔

مزید پڑھیں: اوگرا نے گیس کی قیمتوں میں اضافےکی منظوری دے دی