لاہور: ایشیا کپ 2025 میں میچ ریفری کے معاملے پر پاکستان کرکٹ بورڈ (پی سی بی) کے مطالبے کو آئی سی سی نے مسترد کر دیا ہے۔
ذرائع کے مطابق آئی سی سی نے واضح کیا ہے کہ اینڈی پائی کرافٹ کو مکمل طور پر ہٹایا نہیں جائے گا۔
تاہم ذرائع کے مطابق درمیانی راستہ نکالتے ہوئے یہ امکان ظاہر کیا جا رہا ہے کہ صرف پاکستان کے میچز میں اینڈی پائی کرافٹ کو ریفری کے فرائض سے ہٹایا جا سکتا ہے۔ ان میچز میں ان کی جگہ رچی رچرڈسن کو ذمہ داریاں سونپنے پر غور کیا جا رہا ہے۔
ادھر پی سی بی نے واضح کر دیا ہے کہ اگر پائیکرافٹ کو ریفری کے فرائض سے نہ ہٹایا گیا تو پاکستان ایشیا کپ کے بقیہ میچز کھیلنے سے انکار کر دے گا۔
پاکستان نے مؤقف اختیار کیا ہے کہ بھارت کے خلاف حالیہ میچ میں ریفری کے رویے نے کئی سوالات کھڑے کر دیے ہیں، جس پر فوری کارروائی ضروری ہے۔ دوسری جانب ایشین کرکٹ کونسل (اے سی سی) نے معاملے کو سلجھانے کے لیے مذاکرات شروع کر دیے ہیں۔
بھارتی میڈیا کے مطابق اے سی سی نے درمیانی راستہ نکالنے کے لیے پی سی بی کو تجاویز پیش کی ہیں۔ تجویز دی گئی ہے کہ پورے ٹورنامنٹ کے بجائے صرف پاکستان کے میچز میں اینڈی پائیکرافٹ کو ریفری کے طور پر نہ لگایا جائے۔ اس مقصد کے لیے سابق ویسٹ انڈین کرکٹر رچی رچرڈسن کا نام بطور متبادل سامنے آ رہا ہے۔
واضح رہے کہ گزشتہ روز بھارت کے خلاف میچ میں ریفری کے رویے پر پی سی بی نے سخت احتجاج کیا تھا اور کہا تھا کہ اگر فوری طور پر ریفری کی تبدیلی نہ کی گئی تو پاکستان ایشیا کپ میں مزید شرکت نہیں کرے گا۔
