عالمی برداری دوہرا معیار ترک کرکے اسرائیل کو جرائم پر سزا دے ۔ قطر کے وزیراعظم شیخ محمد بن عبدالرحمان الثانی نے کہاکہ اب وقت آگیا ہے اسرائیل کوسختی سے روکا جائے۔
یہ بات انہوں نے اسلامی رہنماؤں کے ہنگامی اجلاس سے قبل ہونے والے وزرائے خارجہ کے اجلاس سے خطاب میں کہی۔
انہوں نے کہاکہ اسرائیل کو جان لینا چاہیے کہ فلسطینی عوام کی نسل کشی کرکے انہیں اپنی سرزمین سے بے دخل کرنے کی سازش کامیاب نہیں ہوگی۔
اتوار کو دوحہ میں قطری وزیراعظم کی زیر صدارت وزرائے خارجہ کا اجلاس ہوا۔ جس میں عرب و اسلامی رہنماؤں کے مشترکہ ہنگامی اجلاس کے لیے مسودہ اعلامیہ پر غورکیاگیا۔
اس اجلاس میں 9 ستمبر کو قطر میں ہونے والے اسرائیلی فضائی حملے پر بات کی جا رہی ہے۔ جس نے دوحہ میں مقیم کئی حماس رہنماؤں کی رہائش گاہوں کو نشانہ بنایا۔
اس اجلاس میں عرب لیگ اور اسلامی تعاون تنظیم کے رکن ممالک کے وزرائے خارجہ شریک ہیں۔جن میں سعودی عرب کے وزیرِ خارجہ شہزادہ فیصل بن فرحان بھی شامل ہیں۔
سعودی وزارتِ خارجہ نے اسرائیلی حملے کو جارحانہ اقدام قرار دیتے ہوئے اس کی مذمت کی۔ قطر کے ساتھ مکمل یکجہتی کا اعادہ کیاگیا۔