اسلام آباد: امریکی ناظم الامور نیٹلی بیکر کی قیادت میں امریکی سینٹرل کمانڈ اور ڈیزاسٹر ریسپانس گروپ کے وفد نے این ڈی ایم اے کے نیشنل ایمرجنسی آپریشن سینٹر کا دورہ کیا۔
بول نیوز کے مطابق امریکی ناظم الامور نیٹلی بیکر کی قیادت میں امریکی سینٹرل کمانڈ اور ڈیزاسٹر ریسپانس گروپ کے وفد نے این ڈی ایم اے کے نیشنل ایمرجنسی آپریشن سینٹر کا دورہ کیا۔
اس موقع پر امریکی محکمہ خارجہ کی ڈیزاسٹر ایکسپرٹ برائے ایشیا ایوانا ووکو اور ان کی ٹیم نے بھی دو روزہ مشاورتی اجلاس میں شرکت کی۔ اجلاس میں قدرتی آفات کے تدارک اور موسمیاتی تبدیلیوں کے منفی اثرات سے نمٹنے پر تبادلہ خیال کیا گیا۔
چیئرمین این ڈی ایم اے لیفٹیننٹ جنرل انعام حیدر ملک نے وفد کو این ای او سی کی صلاحیتوں، پیشگی انتباہی نظام اور ڈیزاسٹر مینجمنٹ ماڈل پر بریفنگ دی۔
بریفنگ میں بین الاقوامی ریلیف اور ریسپانس کے طریقہ کار، عالمی تعاون، اور جامع بین الاقوامی فرضی مشقوں (CISE) کے ذریعے علاقائی ممالک کے ساتھ مشترکہ تیاری کے لائحہ عمل پر بھی روشنی ڈالی گئی۔
مزید برآں، وفد کو جدید ٹیکنالوجی کے استعمال سے سرچ اینڈ ریسکیو آپریشنز، سیلابی خطرات کی وارننگ اور تیاری کے اقدامات کے بارے میں بھی آگاہ کیا گیا۔
امریکی ناظم الامور نیٹلی بیکر نے این ڈی ایم اے کے ڈیزاسٹر مینجمنٹ ماڈل اور CISE جیسے مشترکہ اقدامات کو خطے کے لیے مثالی قرار دیا۔
انہوں نے کہا کہ امریکہ 2025 کے سیلاب کے دوران پاکستان کی امدادی سرگرمیوں میں سامان، تکنیکی ماہرین اور فلاحی اداروں کے ذریعے بھرپور معاونت یقینی بنائے گا۔
لیفٹیننٹ جنرل پیٹرک فرینک نے بھی این ڈی ایم اے کے فعال اقدامات اور این ای او سی کے کلیدی کردار کو سراہا، جبکہ امریکی وفد نے آفات سے بچاؤ اور باہمی فرضی مشقوں میں مزید تعاون بڑھانے کے عزم کا اعادہ کیا تاکہ خطے کو بڑھتے ہوئے موسمیاتی خطرات سے محفوظ بنایا جا سکے۔
