اسلام آباد ہائیکورٹ میں ڈاکٹر عافیہ صدیقی کیس میں اہم پیش رفت

اسلام آباد ہائیکورٹ نے ڈاکٹر عافیہ صدیقی کی رہائی سے متعلق کیس میں اہم پیش رفت کرتے ہوئے کیس کی سماعت کے لیے چار رکنی لارجر بینچ تشکیل دے دیا ہے۔

عدالت نے کیس کو 10 ستمبر کے لیے سماعت پر مقرر کر دیا ہے اور کاز لسٹ بھی جاری کر دی گئی ہے۔

نئے تشکیل دیے گئے بینچ کی سربراہی جسٹس ارباب محمد طاہر کریں گے جبکہ بینچ میں جسٹس خادم حسین سومرو، جسٹس اعظم خان، اور جسٹس راجہ انعام امین منہاس شامل ہیں۔

عدالتی ذرائع کے مطابق جسٹس انعام امین منہاس نے یکم ستمبر کو اس مقدمے کی فائل چیف جسٹس کو بھجوائی تھی تاکہ معاملے کی حساس نوعیت کے پیش نظر لارجر بینچ تشکیل دیا جا سکے۔

اس سے قبل یہ کیس جسٹس سردار اعجاز اسحاق خان کی عدالت میں زیر سماعت تھا، جہاں انہوں نے گزشتہ سماعت پر وزیراعظم اور کابینہ کے ارکان کو عدالتی حکم عدولی پر توہین عدالت کے نوٹسز جاری کیے تھے۔

عدالتی ذرائع کا کہنا ہے کہ حکومت کی جانب سے ڈاکٹر عافیہ صدیقی کے حوالے سے عدالتی احکامات پر عمل درآمد نہ کرنے پر عدالت نے سخت برہمی کا اظہار کیا تھا، جس کے بعد معاملے کی سنگینی کے پیش نظر اب اس کی سماعت لارجر بینچ کرے گا۔