سکھر: دریائے سندھ میں انتہائی اونچے درجے کے سیلاب کے خدشے کے پیش نظر وزیراعلیٰ سندھ نے ہنگامی رپورٹ طلب کر لی ہے۔
بول نیوز کے مطابق دریائے سندھ میں انتہائی اونچے درجے کے سیلاب کے خدشے کے پیش نظر وزیراعلیٰ سندھ سید مراد علی شاہ نے صوبائی وزیر آبپاشی جام خان شورو سے ہنگامی رپورٹ طلب کر لی ہے۔
وزیراعلیٰ نے دریافت کیا کہ دریائے سندھ میں کتنا سیلابی پانی داخل ہو سکتا ہے اور صوبے میں کتنے دریائی بند حساس قرار دیے گئے ہیں۔
انہوں نے یہ بھی استفسار کیا کہ حساس بندوں کے لیے کون سے حفاظتی اقدامات کیے جا رہے ہیں اور ہدایت دی کہ سیلابی ریلے سے بچاؤ کے لیے حفاظتی بندوں کی ہر ممکن حفاظت کی جائے۔
اس سلسلے میں صوبائی وزیر جام خان شورو اور سیکریٹری آبپاشی سندھ ظریف کھیڑو شام پانچ بجے وزیراعلیٰ کو تفصیلی رپورٹ پیش کریں گے۔