پاکستان میں سب سے زیادہ فروخت ہونے والی چھوٹی گاڑیوں میں شامل سوزوکی آلٹو کی فروخت میں ایک ہی ماہ کے دوران 75 فیصد کمی ریکارڈ کی گئی ہے۔
پاکستان آٹوموٹو مینوفیکچررز ایسوسی ایشن کے جاری کردہ اعداد و شمار کے مطابق سوزوکی کے جون میں فروخت ہونے والی 9,497 یونٹس کے مقابلے میں جولائی میں صرف 2,327 یونٹس فروخت ہوسکیں۔
یہ نمایاں کمی حالیہ حکومتی ٹیکس اقدامات کے بعد سامنے آئی ہے۔ حکومت نے 850 سی سی تک کی گاڑیوں پر جنرل سیلز ٹیکس 12.5 فیصد سے بڑھا کر 18 فیصد کردیا ہے۔
اس کے علاوہ نیا نیو لیوی بھی نافذ کیا گیا ہے جس کے تحت 1300 سی سی تک کی گاڑیوں پر 1 فیصد، 1301 سی سی سے 1800 سی سی تک پر 2 فیصد اور بڑی گاڑیوں پر 3 فیصد ٹیکس لاگو ہوگا۔ اگرچہ آلٹو 850 سی سی سے کم ہے لیکن یہ فیصلے اس کی قیمت پر بھی اثرانداز ہوئے ہیں۔
قیمتوں میں اضافہ اور خریداروں کی مشکلات
ٹیکس میں اضافے کے بعد پاکستان سوزوکی موٹرز کمپنی نے آلٹو کی قیمت بڑھا کر 33 لاکھ 26 ہزار 450 روپے مقرر کردی ہے۔
نئی قیمت نے بجٹ کے لحاظ سے گاڑی خریدنے والے افراد، خاص طور پر پہلی بار گاڑی لینے والے خریداروں کے لیے مشکلات پیدا کردی ہیں۔ روایتی طور پر یہ خریدار آلٹو کی بڑی مارکیٹ شمار ہوتے ہیں۔
پیشگی انوائسنگ کا اثر
کمپنی نے خریداروں کو ٹیکس کے بوجھ سے بچانے کے لیے جون میں ہی ایرلی انوائسنگ کا سہارا لیا اور جولائی و اگست کے آرڈرز پہلے ہی نمٹا دیے۔ اس حکمت عملی سے جون کی فروخت تو بڑھی لیکن بعد کے مہینوں میں نمایاں کمی دیکھنے میں آئی۔
ماہرین کی رائے
ماہرین کا کہنا ہے کہ حالیہ حکومتی اقدامات نے آٹو انڈسٹری کو سخت دباؤ میں ڈال دیا ہے اور اگر ٹیکسز میں نرمی نہ کی گئی تو گاڑیوں کی فروخت مزید متاثر ہوسکتی ہے۔