تین ملکی ٹی ٹوئنٹی سیریز اور ایشیا کپ کیلئے قومی اسکواڈ کا اعلان، بابر اعظم اور محمد رضوان ڈراپ

متحدہ عرب امارات میں شیڈول تین ملکی ٹی ٹوئنٹی سیریز اور ایشیا کپ کیلئے پاکستان کرکٹ ٹیم کے 17 رکنی اسکواڈ کا اعلان کردیا گیا۔

پاکستان، افغانستان اور میزبان یو اے ای کے درمیان ٹرائی نیشن سیریز 29 اگست سے 7 ستمبر تک شارجہ میں کھیلی جائے گی، جبکہ ایشیا کپ 9 سے 28 ستمبر تک ابو ظہبی اور دبئی میں منعقد ہوگا۔

مزید پڑھیں: برطانوی سرزمین ہمیشہ ہی پاکستانی کرکٹرز کے لئے ڈرائونا خواب رہی ہے

اسکواڈ کا اعلان چیف سلیکٹر و ڈائریکٹر ہائی پرفارمنس عاقب جاوید اور ہیڈ کوچ مائیک ہیسن نے پریس کانفرنس میں کیا۔

اسکواڈ:

کپتان: سلمان علی آغا

دیگر کھلاڑی: فخر زمان، شاہین شاہ آفریدی، حارث رؤف، صائم ایوب، خوشدل شاہ، حسین طلعت، محمد نواز، محمد وسیم جونیئر، محمد حارث، ابرار احمد، فہیم اشرف، حسن علی، حسن نواز، صاحبزادہ فرحان، سلمان مرزا اور سفیان مقیم۔

ہیڈ کوچ مائیک ہیسن نے کہا کہ ٹیم نے گزشتہ 9 میں سے 6 میچز جیتے ہیں اور اسکواڈ میں زیادہ تبدیلیاں نہیں کی گئیں۔ انہوں نے بتایا کہ سلمان مرزا کو بنگلا دیش میں عمدہ کارکردگی کی بنیاد پر شامل کیا گیا ہے۔

مزید پڑھیں: بدقسمتی، خوش قسمتی میں کیسے بدلی؟ کرکٹ میچ کی دلچسپ ویڈیو وائرل

چیف سلیکٹر عاقب جاوید کا کہنا تھا کہ موجودہ گروپ مسلسل پرفارم کر رہا ہے، صائم ایوب، فخر زمان اور صاحبزادہ فرحان بہترین کھیل پیش کر رہے ہیں اور ان پر کوئی شک نہیں ہونا چاہیے۔

انہوں نے مزید کہا کہ بابر اعظم اور محمد رضوان اس وقت اسکواڈ میں شامل نہیں مگر انہیں ہمیشہ کے لیے نظر انداز نہیں کیا گیا۔ ہم یہ نہیں کہہ سکتے کہ بابر اور رضوان اب کبھی زیر غور نہیں آئیں گے، فی الحال ہمارے پاس مضبوط آپشنز موجود ہیں۔

عاقب جاوید نے کہا کہ سینئر کھلاڑیوں کیلئے آسٹریلیا کی بگ بیش لیگ میں کارکردگی دکھانے کا موقع موجود ہے، جو وہاں متاثر کن کھیل پیش کرے گا وہ ٹیم میں واپس آسکتا ہے۔

ان کے مطابق موجودہ اسکواڈ کسی بھی بڑی ٹیم، حتیٰ کہ بھارت کو بھی شکست دینے کی صلاحیت رکھتا ہے۔