مودی کی سندھ طاس معاہدہ توڑنے کی کوشش ناکام بنائیں گے، بلاول بھٹو

چیئرمین پیپلز پارٹی بلاول بھٹو زرداری نے بھارت کے وزیرِ اعظم نریندر مودی کی جانب سے سندھ طاس معاہدہ معطل کرنے کے اعلان کی شدید مذمت کی اور کہا کہ بھارت کو عالمی سطح پر اور جنگی میدان میں بھرپور جواب دیا جائے گا۔

بلاول بھٹو نے کہا کہ بھارت کی جانب سے سندھ طاس معاہدہ توڑ کر ڈیم بنانے کی سازشیں کامیاب نہیں ہوں گی اور کراچی والے ہمیشہ کی طرح سندھ کی سرحدوں کا دفاع کرنے کے لیے تیار ہیں۔

حب نیوکینال کے افتتاحی پروگرام میں خطاب کرتے ہوئے بلاول بھٹو نے کہا کہ بھارت کو یہ پیغام پہنچایا جا رہا ہے کہ پاکستان کے عوام اپنے حقوق کے دفاع میں کسی بھی حد تک جا سکتے ہیں۔

ہم بھارت اور مودی کو بتا دیں گے کہ کراچی والے سندھ کے دفاع کے لیے میدان میں ہیں۔ ہم ان کا سفارتی سطح پر بھی مقابلہ کریں گے اور اگر ضرورت پڑی تو جنگی میدان میں بھی ان کا مقابلہ کریں گے۔

بلاول بھٹو نے حب نیوکینال کی افتتاحی تقریب میں کراچی کے لیے اضافی پانی کے منصوبے کا آغاز کیا۔ اس منصوبے کے تحت حب ڈیم سے کراچی کو اضافی پانی فراہم کیا جائے گا جس سے شہر کے دیرینہ پانی کے مسئلے کا حل ممکن ہو سکے گا۔

 انہوں نے کہا کہ یہ منصوبہ شہر قائد کے عوام کا دیرینہ مطالبہ تھا جسے پیپلز پارٹی نے پورا کیا۔ یہ منصوبہ کراچی کے عوام کے لیے ایک بڑی پیشرفت ہے اور اس سے شہر میں پانی کی قلت میں کمی آئے گی۔

حب نیوکینال کی افتتاحی تقریب میں میئر کراچی مرتضیٰ وہاب اور وزیراعلیٰ سندھ مراد علی شاہ نے بھی خطاب کیا۔ مرتضیٰ وہاب نے کہا کہ حب کینال منصوبہ 11 ماہ میں مکمل کیا گیا اور پیپلز پارٹی کی قیادت نے اپنے وعدوں کو عملی شکل دی۔

بلاول بھٹو کی قیادت میں ہم نے ایک سال کے اندر حب کینال مکمل کیا اور شہر کے پانی کے مسائل کو حل کرنے میں ایک قدم اور آگے بڑھایا۔

وزیراعلیٰ سندھ مراد علی شاہ نے کہا کہ حب کینال کراچی کے لیے 20 سال بعد اضافی پانی لے کر آئے گا، اور اس منصوبے کے ذریعے شہر کی پانی کی قلت میں کمی آئے گی۔

 ہم نے وعدہ کیا تھا کہ ایک سال کے اندر منصوبہ مکمل کریں گے اور ہم نے وہ وعدہ پورا کیا۔ اس کے علاوہ وفاقی حکومت کو بھی کراچی کے لیے اضافی پانی فراہم کرنے کی ضرورت ہے۔

حب نیوکینال منصوبہ کراچی کے پانی کی ضروریات کو پورا کرنے کے لیے اہم قدم ہے۔ اس منصوبے کے تحت دو تہائی حصہ کراچی کو فراہم کیا جائے گا اور ایک تہائی بلوچستان کے لیے مختص ہوگا۔

وزیراعلیٰ سندھ نے کہا کہ یہ منصوبہ سندھ اور بلوچستان دونوں کے لیے فائدہ مند ثابت ہوگا۔ انہوں نے مزید کہا کہ دسمبر تک ہم پرانی کینال بھی مکمل کر لیں گے تاکہ کراچی کے عوام کو مزید پانی کی فراہمی ہو سکے۔

بلاول بھٹو نے اس موقع پر بھارت کی جانب سے پاکستان میں دہشت گردی میں ملوث ہونے کی بھی مذمت کی اور کہا کہ بھارت جیسا بزدل دشمن پاکستان میں دہشت گردی کے معاملات میں ملوث ہے۔

انہوں نے کہا کہ بھارت کو عالمی سطح پر منہ کی کھانا پڑی اور پاکستان نے نہ صرف جنگی میدان میں بلکہ سفارتی سطح پر بھی بھارت کو شکست دی۔