شہر قائد میں رواں سال کے 220 دنوں کے دوران تیز رفتار اور بے احتیاط ڈرائیونگ کے باعث پیش آنے والے ٹریفک حادثات نے 547 زندگیاں نگل لیں۔
جاں بحق ہونے والوں میں 426 مرد، 51 خواتین اور 70 بچے شامل ہیں۔
اعداد و شمار کے مطابق بسوں سے پیش آنے والے حادثات میں 25، منی بسوں سے 11، کوچز سے 6، ٹریلرز سے 48، ٹرکوں سے 62، ڈمپرز سے 20، واٹر ٹینکرز سے 44، آئل ٹینکرز سے 6، سوزوکی پک اپ سے 15، جیپ سے 5 اور کار سے 62 افراد جاں بحق ہوئے۔
مزید پڑھیں: سندھ حکومت، محنت کشوں کے لیے 7 لاکھ کی حادثاتی ہیلتھ انشورنس اسکیم منظور
موٹرسائیکل رکشہ کی زد میں آکر 12، موٹرسائیکل سے 90 جبکہ نامعلوم گاڑیوں کی ٹکر سے 105 افراد زندگی سے ہاتھ دھو بیٹھے۔حادثات میں سب سے زیادہ متاثر ہونے والوں میں 278 موٹرسائیکل سوار، 180 پیدل چلنے والے اور 83 دیگر گاڑیوں کے سوار شامل ہیں۔
ضلعی سطح پر ڈسٹرکٹ ملیر سب سے زیادہ 174 اموات کے ساتھ سرفہرست رہا، اس کے بعد ڈسٹرکٹ کیماڑی و ویسٹ میں 140، سینٹرل میں 76، ایسٹ میں 55، کورنگی میں 52، ساوتھ میں 44 جبکہ ڈسٹرکٹ سٹی میں 3 افراد ٹریفک حادثات میں جاں بحق ہوئے۔
ماہرین کے مطابق ان حادثات کی بڑی وجوہات میں تیز رفتاری، ٹریفک قوانین کی خلاف ورزی اور ناکافی انفورسمنٹ شامل ہیں، اور صورتحال کو بہتر بنانے کے لیے فوری اقدامات ناگزیر ہیں۔