اقوامِ متحدہ کی فلسطین کانفرنس میں پاکستان کی نمائندگی کرنے والے نائب وزیر اعظم و وزیر خارجہ اسحاق ڈار آج مصروف دن گزاریں گے جب کہ عالمی رہنماؤں سے بھی اہم ملاقاتیں متوقع ہیں۔
نائب وزیرِاعظم اور وزیرِ خارجہ سینیٹر اسحاق ڈار اقوامِ متحدہ میں ہونے والی اعلیٰ سطح بین الاقوامی فلسطین کانفرنس میں آج (28 جولائی) پاکستان کی نمائندگی کریں گے۔ نیویارک میں ان کا دن عالمی سفارتکاری کے حوالے سے مصروف رہے گا۔
یہ کانفرنس ’’فلسطین کے مسئلے کا پُرامن حل اور دو ریاستی حل کا نفاذ‘‘ کے موضوع پر ہو رہی ہے جس کی مشترکہ میزبانی سعودی عرب اور فرانس کر رہے ہیں۔
کانفرنس کی صدارت سعودی وزیر خارجہ شہزادہ فیصل بن فرحان السعود اور فرانسیسی وزیر جین نوئل بیروٹ کریں گے۔
فلسطین سے متعلق یہ اعلیٰ سطحی کانفرنس تین روزہ ہے جو 28 جولائی سے 30 جولائی تک جاری رہے گی۔ اس دوران نائب وزیرِاعظم جنرل اجلاس کے پلینری سیشن میں پاکستان کا موقف پیش کریں گے۔
نائب وزیرِاعظم و وزیرِ خارجہ کانفرنس کی سائیڈ لائنز پر مختلف ممالک کے اعلیٰ حکام سے ملاقاتیں بھی کریں گے۔ ان ملاقاتوں میں مصر، کویت، بنگلادیش کے مشیر برائے امورِ خارجہ، اردن کے نائب وزیراعظم اور فلسطین کے وزیراعظم محمد مصطفیٰ شامل ہیں۔
اسحاق ڈار امریکا میں مقیم پاکستانی صحافیوں کے ساتھ پاکستان مشن میں ایک خصوصی پریس بریفنگ سے بھی خطاب کریں گے جس میں وہ کانفرنس کی اہم تفصیلات اور پاکستان کے مؤقف پر روشنی ڈالیں گے۔
