“آپریشن مہادیو کے تحت بھارتی فوج کا فیک انکاؤنٹرز کا نیا سلسلہ، پاکستانی قیدیوں کو نشانہ بنانے کا منصوبہ بے نقاب”
بھارت نے ’’آپریشن سندور‘‘ کی ناکامی پر پردہ ڈالنے کے لئے نیا مذموم فوجی منصوبہ ’’آپریشن مہادیو‘‘ شروع کردیا۔
سیکیورٹی ذرائع کے مطابق ’’آپریشن مہادیو‘‘ کے نام پر غیر قانونی اور جبراً حراست میں رکھے معصوم پاکستانیوں کو فیک ان کاؤنٹرز میں استعمال کرنے کا مذموم منصوبہ بے نقاب ہوگیا ہے۔
سیکیورٹی ذرائع کا کہنا ہے کہ ’’آپریشن مہادیو‘‘ کا مقصد نہ صرف مقبوضہ کشمیر میں بڑھتی ہوئی تحریکِ آزادی کو کچلنا ہے بلکہ اندرون ملک سیاسی ساکھ بحال کرنا ہے۔
ذرائع نے بتایا کہ بھارت یہ کوشش کررہا ہے کہ اسے ایک کامیاب فوجی مہم کے طور پر پیش کیا جائے تاکہ ’’آپریشن سندور‘‘ کی خفت مٹائی جاسکے۔ پہلگام فالس فلیگ آپریشن کے فوری بعد بھی بھارتی فوج کی جانب سے فیک ان کاؤنٹرز کا سلسلہ شروع کیا گیا تھا۔
یہ بھی پڑھیں: آپریشن سندور کی ناکامی سے بوکھلاہٹ میں اضافہ، بھارتی فوج اور حکومت آمنے سامنے
سکیورٹی ذرائع نے یہ بھی بتایا کہ اس سے پہلے بھی 24 اپریل کو آزاد جموں کشمیر کے دو شہریوں محمد فاروق اور محمد دین کو غلطی سے بارڈر کراس کرجانے پر بھارتی فوج نے بہیمانہ طریقے سے ان کاؤنٹر میں شہید کردیا گیا تھا۔
ذرائع نے انکشاف کیا کہ منصوبے کے تحت مختلف جیلوں میں قید افراد کو مارنے کے بعد پاکستان کی طرف سے سرحد پار دہشت گرد قرار دیا جائے گا جب کہ 29 اور 30 اپریل کو ڈی جی آئی ایس پی آر نے اپنی پریس کانفرنسز میں پہلے ہی 723 پاکستانی افراد جو مختلف بھارتی جیلوں میں غیر قانونی طور پر بند ہیں، کی تفصیلات بتاچکے ہیں۔
ذرائع کا کہنا تھا کہ اس کے علاوہ 56 ایسے پاکستانی افراد بھی ہیں جو بھارتی خفیہ ایجنسیوں نے غیر قانونی اور جبراً اپنی حراست میں رکھے ہیں، ان 56 افراد کی تفصیلات بھی ڈی جی آئی ایس پی آر اپنی 29 اور 30 اپریل کو بتاچکے ہیں۔
سکیورٹی ذرائع نے مزید انکشاف کیا کہ حسب روایت فیک ان کاؤنٹر زکے فوری بعد بھارتی میڈیا کو پہلے ہی سے ان افراد کی لاشیں اور پلانٹڈ ہتھیار وغیرہ کی ویڈیوز اور تصویریں شیئر کی جا رہی ہیں۔
مصدقہ اطلاعات کے مطابق غیر قانونی طور پر حراست میں رکھے گئے افراد کو زندہ دہشت گرد ظاہر کرکے میڈیا کے سامنے پاکستان مخالف بیانات اور اعتراف جرم کے بیان بھی دلوائے جاسکتے ہیں جب کہ بھارتی حراست میں رکھے گئے ان افراد کو کسی بھی وقت پاکستان کے خلاف ہرزہ سرائی اور جارحیت کرنے کے لیے استعمال کیا جاسکتا ہے۔
ذرائع نے یہ بھی بتایا کہ بھارتی فوج مقبوضہ کشمیر میں فیک ان کاؤنٹر اسپیشلسٹ کے طور پر بدنام زمانہ ہے، آپریشن مہادیو بھارتی فوج کی جانب سے فیک انکاؤنٹرز کا تسلسل ہے جب کہ پہلگام فالس فلیگ اور آپریشن سندور کی ناکامی میں ہزیمت اٹھانے کے بعد بھارت مکمل طور بوکھلا چکا ہے۔