راولپنڈی: پیرودھائی کے علاقے میں غیرت کے نام پر قتل کی گئی خاتون سدرہ کے کیس میں عدالتی حکم پر چھتی قبرستان میں جوڈیشل مجسٹریٹ قمر عباس تارڑ کی نگرانی میں قبر کشائی کی گئی۔
قبر کشائی کے دوران سیکیورٹی کے سخت انتظامات کیے گئے، ایلیٹ فورس کے اہلکار قبرستان میں تعینات رہے جبکہ قبر کے اطراف قناتیں اور شامیانے لگا کر مقام کو عام افراد کی رسائی سے محفوظ رکھا گیا۔
ہولی فیملی اسپتال کی لیڈی میڈیکل آفیسر ڈاکٹر مصباح کی سربراہی میں میڈیکل ٹیم موقع پر موجود رہی، عدالتی معائنے کے بعد ٹی ایم اے کے عملے نے قبر کھودنے کا عمل شروع کیا۔
یہ بھی پڑھیں: بلوچستان میں خاتون اور مرد کا بہیمانہ قتل؛ وزیراعظم کا ملزمان کو قانونی کٹہرے میں لانے کا حکم
اس موقع پر دو زیرِ حراست ملزمان، گورکن راشد اور قبرستان کمیٹی کے سیکریٹری سیف الرحمان کو بھی نشاندہی کے لیے موقع پر لایا گیا۔
واضح رہے کہ سدرہ کو مبینہ طور پر گھر سے بھاگنے کے بعد ایک مقامی جرگے کے حکم پر غیرت کے نام پر قتل کر دیا گیا تھا۔ پولیس کے مطابق مقتولہ کو خاموشی سے رات کی تاریکی میں دفن کر دیا گیا اور واقعے کے شواہد مٹانے کی کوشش کی گئی۔
عدالتی احکامات کی روشنی میں کی جانے والی اس قبر کشائی کا مقصد واقعے کے شواہد جمع کرنا اور فرانزک تحقیقات کو آگے بڑھانا ہے، تاہم کیس کی تفتیش پولیس اور عدالتی حکام کی نگرانی میں جاری ہے۔
