اسٹیٹ بینک آف پاکستان نے مالی سال 2025-26 کے لیے مانیٹری پالیسی کمیٹی (MPC) کے اجلاسوں کا پیشگی کلینڈر جاری کر دیا ہے۔
یہ اقدام مانیٹری پالیسی کے تعین میں شفافیت، پیش بینی اور عوامی رسائی کو بہتر بنانے کے سلسلے کی ایک اہم کڑی ہے۔
اسٹیٹ بینک کے اعلامیے کے مطابق، رواں مالی سال کے دوران مجموعی طور پر 8 مانیٹری پالیسی اجلاس منعقد کیے جائیں گے۔ ان اجلاسوں کا شیڈول درج ذیل ہے:
پہلی مانیٹری پالیسی: 30 جولائی 2025
دوسری مانیٹری پالیسی: 15 ستمبر 2025
تیسری مانیٹری پالیسی: 27 اکتوبر 2025
چوتھی مانیٹری پالیسی: 15 دسمبر 2025
پانچویں مانیٹری پالیسی: 26 جنوری 2026
چھٹی مانیٹری پالیسی: 9 مارچ 2026
ساتویں مانیٹری پالیسی: 27 اپریل 2026
آٹھویں (آخری) مانیٹری پالیسی: 15 جون 2026
اسٹیٹ بینک کے مطابق، کسی غیر متوقع واقعے کی صورت میں اگر کوئی اجلاس مؤخر یا منسوخ کیا جائے تو نئی تاریخ کا بروقت اعلان کیا جائے گا تاکہ اسٹیک ہولڈرز کو پیشگی اطلاع مل سکے۔
مزید برآں، مانیٹری پالیسی کی مؤثر رسائی اور شفافیت بڑھانے کے لیے ششماہی بنیادوں پر خصوصی رپورٹ شائع کی جائے گی، جس میں اہم معاشی اشاریوں کی پیش گوئیاں، تجزیے اور پالیسیاں شامل ہوں گی۔
یہ رپورٹس ہر سال جولائی اور جنوری میں منعقدہ ایم پی سی اجلاسوں کے دو ہفتے بعد جاری کی جائیں گی۔
اسٹیٹ بینک نے واضح کیا ہے کہ یہ رپورٹیں اور کلینڈر جاری کرنا مانیٹری پالیسی کے فریم ورک میں شفافیت، پیشگی منصوبہ بندی اور اعتماد سازی کے لیے اہم قدم ہے۔
اسٹیٹ بینک نے مزید اعلان کیا کہ مالی سال 2026-27 کے لیے مانیٹری پالیسی اجلاسوں کا پیشگی کلینڈر جولائی 2026 میں جاری کیا جائے گا۔