انگلش اسپیکنگ یونین آف پاکستان کا کراچی میں شاندار سالانہ عشائیہ
انگلش اسپیکنگ یونین آف پاکستان (ESUP) نے 19 جولائی 2025 کی شام کراچی میں اپنا سالانہ عشائیہ منعقد کیا۔جس میں زندگی کے مختلف شعبوں سے تعلق رکھنے والے معزز اراکین، سفارت کاروں اور سرکاری عہدیداروں نے شرکت کی۔
تقریب کا مقصد ثقافتی اورعلمی تبادلے کا فروغ تھا۔ تقریب میں کئی نامورشخصیات شریک ہوئیں، جن میں ESUP کے سرپرستِ اعلیٰ جناب عزیز میمن اور صدر جناب پرویز مدراس والا شامل تھے۔
وزیرِ بلدیات سندھ جام خان شورو اس عشائیے کے مہمانِ خصوصی تھے۔جنہیں ESUP کی قیادت نے تعلیمی و ثقافتی اقدامات میں ان کی مسلسل حمایت کے اعتراف کے طور پر اعزازی شیلڈ پیش کی۔
سالانہ عشائیہ نہ صرف ممبران اور معزز مہمانوں کے لیے ملاقات اور رابطے کا ذریعہ بنا بلکہ ESUP کے اُس عزم کی بھی تجدید ہوئی۔
جو نوجوانوں اور پیشہ ور افراد میں تقریری صلاحیتوں، ثقافتی ہم آہنگی اور بین الاقوامی سطح پر مؤثر گفتگو کو فروغ دینے سے وابستہ ہے۔
انگلش اسپیکنگ یونین آف پاکستان ایک غیر منافع بخش تنظیم ہے جو انگریزی زبان کے ذریعے مختلف ثقافتوں کے مابین تعلقات کو فروغ دینے کے لیے کام کرتی ہے۔
یہ تنظیم مسلسل ایسے مواقع فراہم کرتی ہے جہاں بامعنی مکالمے، تنقیدی مباحثے اور صحت مند تبادلہ خیال کی حوصلہ افزائی کی جاتی ہے۔
ESUP باقاعدگی سے عالمی سطح کی تقریبات جیسے انٹرنیشنل پبلک اسپیکنگ کمپٹیشن (IPSC) اور شاعری کے مقابلے منعقد کرتی ہے، جن میں نوجوانوں کو اپنی بات پُراعتماد اور باوقار انداز میں پیش کرنے کا موقع دیا جاتا ہے۔
تقریب کا اختتام ESUP کے اُس عزم کی تجدید پر ہوا کہ وہ نوجوانوں کی فکری تربیت، بین الاقوامی ہم آہنگی اور مؤثر اظہارِ خیال کے مشن کو جاری رکھے گا۔